1406, 18 avril. — Montbrison.

Loÿs, duc de Bourbonnois, conte de Forois et seigneur de Beaujeu, per et chamberier de France, a nostre tresorier de Forois qui a present est et pour le temps avenir sera, salut. Pour les bons et agreables services que nous a faitz ou temps passé, fait continuellement et esperons que face nostre amé et feal chevalier messire Amieu Vert¹, lequel au jour de huy, de nostre main avons fait chevalier et pour augmenter et acroistre et vivre plus honnerablement en nostre service nous lui avons donné et donnons de grace especial par ces presentes la somme de cinquante livres tournois de pension annuelle a prendre et avoir chascun an tant comme il vivra des deniers de vostre recepte. Si voulons et mandons que la dite some de cinquante livres tournois vous paiez chascun an doresenavant au dit messire Amieu Vert ou a son certain commandement le temps de sa vie seulement aux termes qui s'ensuivent, c'est assavoir : la moitié a la Saint Jehan Baptiste prouchain venant et l'autre moitié au Noel ensuivant, et doresenavant de terme en terme, et par rapportant vidimus de ces presentes pour la premiere fois et quittance du dit chevalier tout ce qui pour ceste cause lui aura esté paié sera alloué es comptes de celui ou ceulx a qui il appartiendra par noz amez et feaulx genz de noz comptes, auxquelx nous mandons que ainsi le facent, car ainsi le voulons estre fait, et que ces presentes soient enregistrees en nostre chambre des comptes. En tesmoign de ce, nous avons fait mettre nostre seel a ces presentes. Donné en nostre ville de Montbrison, le XVIII^e jour d'avril l'an de grace mil IIII^C et six.

Par monseigneur le duc.