1405, 20 novembre.

Loÿs, duc de Bourbon, conte de Forés, baron et seigneur de Beaujeu, per et chamberier de France, a touz ceulx qui verront ces presentes lettres, ‹salut›. Savoir faisons que, pour le bon rapport qui fait nous a esté par les gens de nostre conseil en Forés de la persone de Michiel Faure² nostre prevost de Saint Victour³, confians a plain de son sens, loyalté, proudomie et bonne diligence, ycelui Michiel avons fait, institué, ordené et establi, faysons, ordenons, instituons et establissons par ces presentes prevost et clerc du papier de nostre chatel et chatellanie de Bellegarde⁴ aux droiz, profis et esmolumans acostumés, au lieux de Gregoire Clavel, nagaires prevost et clerc du papier dudit lieux, lequiel, pour certaines et justes causes qui a ce nous movent, nous en avons deschargié et deschargeons par ces presentes, auquiel Michiel, novel prevost et clerc du papier dudit lieux et chastellenie de Bellegarde, nous avons donné et donnons par ces presentes plain povoir de fere et excercer les offices de prevost et clerc de papier tant qu'il nous plaira. Si donnons en mandemant a noz amés et feaulx gens de nous comptes en Forés que, receu dudit Michiel soufisant plege et le serement acostumé en tel cas, desdiz offices le metens ou fassent metre en possession et saisine et d'iceulx, avec leur droiz, profis et esmolumans acostumés et appartenans, le facent et souffrent joïr et user paisiblement. Mandons aussi a toux noz officiers et subgés, prions et requerons toux autres que audit Michiel en excercent sesdiz offices et les choses appartenanz a iceulx obeïssent et entendent diligenment, et li donnont aide et confort, si mestier en a et par lui en sont requis. Donné soubz notre seel, le XX^e jour du moys de novembre, l'an de grace mil quatre cens et cinq.

Par monseigneur le duc, a la relacion monseigneur de Norry⁵.