1405, 11 juin.

Loÿs, duc de Bourbonnois, conte de Forez, baron et seigneur de Beaujeulois, per et chamberier de France, a tous ceulx qui ces presentes lettres verront, salut. Savoir faisons que, pour le bon rapport et tesmongnage qui fait nous a esté de la personne de Jehan Rochecte, confians a plain de son sens, loyaulté et bonne dilligence, icellui avons fait, ordonné, constitué et establi, faisons, ordonnons, constituons et establissons par ces presentes prevost de Chasteauneuf¹ et receveur des deniers, cens, rentes, grains et autres redevances a nous deubz a cause de ladicte prevosté et des appartenences et despendences d'icelle prevosté tant comme il nous plaira, pour et en lieu de Zacarie Regnault², a present prevost et concierge de nostre chastel de Cleppé³, lequel, tant pour l'occuppacion d'iceulx offices de Cleppé comme pour certaines et justes causes qui a ce nous ont meu et meuvent, nous en avons deschargé et deschargons par ces presentes, a telz et semblables gaiges que avoit et prenoit ledit Zacarie et aux drois, prouffis et esmolumens acoustumés prendre oudit office, auquel Jehan Rochecte nous avons donné et donnons par ces presentes plain povoir, auctorité et mandement especial de recevoir et lever tous lesdiz deniers, cens, rentes et autres revenus a nous dehues a cause de ladicte prevosté comme dit est. Mandons et commandons a tous lez justiciers, officiers et subgiez de nostredicte conté de Forez, prions et requerons tous autres que, en faisant et excerçant ledit office, a lui obeïssent et entendent diligement, et lui prestent conseil, confort et aide se mestier en a et par lui en sont requis. Mandons aussy a noz amés et feaulx gens de noz comptes en Forez et tresorier audit païs que, premierement et avant toute euvre receu dudit Jehan le serement acoustumé de fere en tel cas et causcion souffisante, ilz le mectent et instituent ou facent mectre et instituer en possession et saysine dudit office, en deboutant ledit Zacarie et tous autres qui dudit office se vouldroient entremectre, et des drois, prouffis et esmolumens dessus diz le fectes et seuffres joïr et user sans en donner aucun empeschement, en lui allouant et rabbatant de sa recepte les gaiges ordinaires acoustumés de prendre a cause de ladicte prevosté. En tesmoing de ce, nous avons fait mectre nostre seel a ces presentes fectes et donnees le XI^e jour de juing, l'an de grace mil CCCC et cinq.

Par monseigneur le duc, a la relacion de monseigneur de Norry⁴, presens tous messeigneurs des comptes⁵, le chantre de Montbrison⁶ et autres.