1405, 10 juin.

Loÿs, duc de Bourbonnois, conte de Fourez, seigneur de Beaujeu, per et chamberer de France, a nostre bailli de Bourbonnois ou a son lieutenant, salut. Receue avons la supplicacion de la feme et des amis et parens de Guillaume Boulart, nostre subget et justizable, prisonner en noz prisons a Molins, contenent comme le jour de la feste de Penthecouste derrerement passee ot un an fut fait accord entre messire Hugues Fimier, prestre, et ledit Guillaume Boulart que ycelui Guillaume estoit et demoroit quicte envers ledit prestre de toutes les chouses en quoy il lui povoit estre tenu jusques au jour dudit accord fait, réservé audit prestre la despoilhe d'un certain pré assis en la parroche de Neglise¹, laquelle ledit prestre devoit convertir a son proffit jusques a quatre ans lors a venir, et de ce fut mis ledit accord par escript en une cedulle de papier et signee du seing dudit prestre, laquelle cedule ledit Guillaume avoit tant portee sur lui qu'elle estoit rompue et dessiree. Et pour ce estoit venu a Molins et avoit faicte reffaire ladicte cedulle au clerc Jehan Cadier et l'avoit requis que la seignast du pareilh seing dudit prestre, lequel n'en vost riens faire, et puis s'en estoit venu en l'ovreur de Humbert Poissonat, auquel il trouva un jeune enffent appellé Hugonin Boutat, auquel il dist que feist le samblable seing en ladicte cedulle qui estoit en une lectre scellee qui estoit signee du seing dudit prestre, lequel Hugonin signa et contreffit ledit seing et l'escriptssit en ladicte cedulle et accord ainsi reffait. Et pour ce qu'il venit a la notice de nostre chastellain de Beçay² et de Pougny³, nostredit chastellain le prist et le fit mectre en noz prisons a Molins, et confessa icellui Guillaume incontinant ledit fait par devant vostre lieutenant, en nous humblement suppliant comme ledit Boulart soyt povre et ignorant personne et que pour ledit cas a moult longuement demoré en nozdictes prisons a Molins et encores y est en grant povreté et misere, il nous pleust a lui sur ce impartir nostre grace et misericorde et icellui Guillaume fere recevoir a emande civille. Nous, inclinans a leur supplication et requeste, a ycellui Guillaume avons octroié et octroions par ces presentes de grace especial qu'il soit sur ledit cas receu a emande civille. Si vous mandons que icellui Guillaume Boulart vous recevés sur et pour ledit cas a ladicte emande civille, laquelle nous voulons a lui estre par vous taxee a la somme de douze livres tornois, qu'il en sera tenuz de paier a nostre tresourer de Bourbonnois par nous, et d'icelle somme paier, bailler bons et souffisans pleges et caucions. Et donnons en mandement a tous a qui il appartiendra que ledit Guillaume laissent, facent et sueffrent joïr et user paisiblement senz le molester ou empescher aucunement au contraire pour cause de ce, ains ses corps et biens pour ce pris lui soient mis a plaine et pure delivrance par cellui ou ceulx de noz juges a qui il appertiendra. Donné soubz nostre seel, le dixesme jour du moys de juing, l'an de grace mil quatre cens et cinq.

Par monseigneur le duc, a la relacion monseigneur de Norry⁴.