1405, 26 mai. — Paris.
Louis, duc de Bourbonnais etc., nomme Guillaume Baille à l'office de châtelain de Saint-Héand, vacant par la mort de Jean de Lavieu, qui en était le détenteur.
A. Original perdu.
B. Copie dans un des registres papier de la Chambre des comptes de Montbrison, effectuée sans doute par J. Robertus le 3 juin 1405, date à laquelle ce dernier enregistre le serment dudit Guillaume Baille à la suite de la copie, la copie et l'enregistrement du serment étant de la même main. Archives départementales Loire, B 2005, fol. 25v.
Loÿs, duc de Bourbonnois, conte de Forois et seigneur de Beaujeu, per et chamberier de France, a touz ceulx qui ces presentes lettres verront, salut. Savoir faisons que, pour le bon rapport qui fait nous a esté de la personne de Guillaume Baille, nous, confianz a plain de son senz, loiauté et bonne diligence, ycellui avons fait, ordené et establi, et par ces presentes faisons, ordenons et establissons nostre chastellain de Saint Hayen1 aux gaiges, drois, prouffis et emolumens accoustumés et audit office appartiennent, pour et ou lieu de feu Jehan de Lavie qui nagaires estoit trespassé tenant ledit office, auquel Guillaume Baille nous avons donné et par ces presentes donnons plain povoir, auctorité et mandement especial de tenir et avoir ledit office en la forme et maniere que le tenoit et excerçoit ledit feu de Lavieu, faire et excercer tout ce que a ycellui office appartient et que a bon et loial chastellain puet et doit appartenir tant comme il nous plaira. Si donnons en mandement par ces presentes a noz amez et feaulx genz de noz comptes et baillia de Fourez que, receu dudit Guillaume le serment en tel cas accoustumé, ilz le mectent et instituent en possession et saisine dudit office et d'icellui, et des gaiges, drois, prouffiz et emolumens dessus diz le facent, laissent et sueffrent joïr et user paisiblement et obeïr de touz noz subgez a qui il appartiendra aux choses touchans ledit office. Mandons aussi au prevost ou receveur dudit lieu de Saint Hayen que lesdiz gaiges paie chascun an audit Guillaume aux termes accoustumés, et, par rapportant vidimus de ces lettres pour une seule fois et quittance sur ce, il nous plait tout ce que ledit prevost aura paié a cause desdiz gaiges estre alloué en ses comptes et rabatu de sa recepte partout ou mestier sera, non obstant quelconques lettres subreptices a ce contraires. En tesmoignage de ce, nous avons fait mectre nostre seel secret a ces presentes. Donné a Paris, le XXVIe jour de may, l'an de grace mil IIIIC et cinq.
Par monseigneur le duc.
(Signé :) De Bar.
1. Saint-Héand : Loire, ar. Saint-Étienne, c. Sorbiers.
bailli répété B.
Édition : Olivier Mattéoni .
Consulter la bibliographie — Afficher le XML source de l'acte — Afficher la version pdf de l'acte.