1405 (n. st.), février. — Paris.

Loÿs, duc de Bourbonnois, conte de Fourez et seigneur de Beaujeu, per et chamberier de France. Savoir faisons a tous presens et avenir, nous avoir receu humble supplicacion des amis charnelz de Barthelemi Ogier dit Villars, povre laboureur, chargié de femme et de quatre petis enfans, de nostre ville de Chavanannes² en Beaujeuloiz, contenant que comme ledit Villars fust tenu a l'abbé de Jo³ en XIIII bichés de froment a cause de certains gaignages qu'il tenoit de lui, et semblablement ledit abbé fust tenus en autres XIIII bichés de froment a certaines trois personnes ses creanciers, c'est assavoir a l'un en sept bichés, a l'autre en quatre bichés et a l'autre en trois bichés ; et jasoit ce que pour satisfaire a sesdiz trois creanciers, ledit abbé eust baillié en paiement a iceulx ledit Villars, et que icellui Villars, a la requeste dudit abbé, leur ont respondu et promis de paier pour et ou nom dudit abbé lesdiz XIIII bichés de froment. Neantmoins certain temps aprés, icellui abbé, pour ce qu'il ne trouva ou papier de ses debtes royé ne chancellé ledit debte dudit Villars, fist gaiger et pignorer⁴ ledit Villars, icellui estant hors de son hostel et dudit lieu, de deux pourceaulx qu'il avoit et le adjourner a certain jour en la presence de pluseurs illec presens, jasoit ce qu'il fust absent, pour veoir, vendre et livrer sesdiz pourceaulx, a laquelle journee ledit abbé, en l'absence dudit Villars, fit vendre, crier et subaster lesdiz pourceaulx et iceulx fit acheter par un de des gens, et aprés ce, les fit tuer, baconner et porter en son hostel. Et comme ledit Villars oÿ dire que icellui abbé avoit fait vendre iceulx pourceaulx, il fist adjourner ledit abbé par devant le juge dudit lieu a certaine journee, a laquelle icelles parties comparans, ledit abbé fist foy de sondit papier ouquel il monstra par escript commant ledit Villars lui devoit lesdiz XIIII bichés de froment. Et pour ce furent appellés, interrogués et oÿs sur ce lesdiz creanciers qui affermerent estre vray que ledit de Villars leur avoit respondu pour et ou nom et a la requeste dudit abbé desdiz XIIII bichés de froment, et ainsi se departirent. Et aprés ce, ledit Villars, soy veant ainsi mal traictié et trevaillié sans cause, esmeus des parolles de sadicte femme qui ledit fait lui mettoit tous jours avant, s'en alla celle nuit en l'abbaye dudit lieu de Jo vers l'abbitacion dudit abbé, et par une fenestre entra en la chambre ou estoient lesdiz pourceaulx baconnez et pendus, et prist l'un desdiz pourceaulx ou bacons avec un coissin qu'il mist sur son col et l'emporta en son hostel. Et lendemain au matin, pour ce qu'il vit deux ou trois sergens qui venoient vers lui, doubtant rigueur de justice, s'enfouy et absenta de nostredit païs de Beaujoloiz, delaissiés sadicte femme et sesdiz enfans en grant povreté et meschief de ce et de tous ses biens que ont esté prins et mis en nostre main, et n'oseroit ledit Villars jamais retourner en nostredit païs, se par nous ne lui estoit nostre grace impartie sur ce, si comme dient lesdiz supplians en nous requerant humblement que, comme ledit Villars ait tous jours esté homme de bonne fame et renommee sans ce que oncques mais il ait esté attaint ne convaincu d'aucun autre villain cas, blasme ou reproche, eue compassion a sadicte femme et enfans, il nous pleust nostredicte grace lui eslargir sur ce. Pour quoy nous, ces choses considerees, voulans misericorde preferer a rigueur de justice, a icellui Barthelemi Ogier dit Villars, de nostre certaine science et grace especial et de nostre auctorité et puissance, avons quicté, remis et pardonné et par ces presentes quictons, remectons et pardonnons le cas, crisme, fait, larrecin et delit dessus diz avecques toute amende, peine et offense corporelle et criminelle en quoy il pourroit estre encouru envers nous et justice pour occasion de ce, l'amende civile a nous reservee, a la tauxacion de cellui ou ceulx de noz juges a qui il appartendra. Et neantmoins cassons, revocquons et anullons tous bans, appeaulx, proclamacions et procés fais et encommenciés a fere contre lui en le restituant et remectant a sa bonne fame, rennomee ou païs et ailleurs et a ses biens non confisqués, en imposant silence perpetuel sur ce a nostre procureur present et avenir, satisfacion ou restitucion faicte a partie civilement tant seulement. Si donnons en mandement par ces presentes a noz bailli et juge de Beaujeuloiz et a tous noz autres justiciers et officiers presens et avenir ou a leurs lieuxtenans et a chascun d'eulx si comme a lui appartendra que ledit Villars de nostre presente grace, remission et pardonnance facent, laissent et sueffrent joïr et user plainement, paisiblement et perpetuelment, sans le molester ou empescher ne souffrir estre molesté ou empeschié orez ne pour le temps avenir, en corps ne en biens en aucune maniere au contraire, mais se sesdiz corps et biens ou aucuns d'iceulx estoient pour occasion de ce prins, saisis, arrestés ou empeschiés, se les lui mectent ou facent mectre tantost et sans delay a plaine delivrance. Et afin que ce soit ferme chose et estable a tous jours mais, nous avons fait mectre nostre seel a ces presentes, sauf nostre droit en autres choses et l'autruy en toutes. Donné a Paris, ou moys de fevrier, l'an de grace mil quatre cens et quatre.

(Repli:) Par monseigneur le duc, monseigneur l'abbé de Moustierarramé⁵, l'Ermite de la Faye⁶ et autre presens