1405 (n. st.), 10 janvier. — Moulins.

Loÿs, duc de Bourbonnois, conte de Fourez, seigneur de Beaujeu, per et chamberier de France, a nostre tresorier de Beaujeuloiz¹, salut. Nous avons donné et par ces presentes donnons a Huguenin Usarnier, jadiz veneur et serviteur de feu nostre tres chier et amé cousin le seigneur de Beaujeu, que Dieux absoille, pour consideracion des bons et agreables services qu'il lui a faiz et a present fait a nostre tres chiere et tres amee compaigne la duchesse de qui il est serviteur, et pour contemplacion d'elle, la somme de six livres tournois, a les prendre de et sur votre recepte. Si voulons et vous mandons que ladicte somme de six livres t. vous paiez, baillez et delivrez ou faictes paier, bailler et delivrer audit Huguenin des plus clers deniers de vostredicte recepte, et par rapportant ces presentes et quictance de lui sur ce ladicte somme de VI l. t. ainsi paiee sera allouee en voz comptes et rabatue de vostre recepte par les gens de noz comptes a Villefranche, ausquelx nous mandons que ainsi le facent sanz contredit, non obstant autres dons par nous ou nostredit feu^a cousin a lui autreffoiz faiz et ordonnances ou deffenses au contraire. Donné a Molins, soubz nostre seel, le X^e jour de janvier, l'an mil quatre cens et quatre.

Par monseigneur le duc en son conseil.