1405 (n. st.), 1er janvier. — Moulins (Château).

Loÿs, duc de Bourbonnois, conte de Forois, seigneur de Beaujeu, per et chambrier de France, a nostre amé tresorier de Forez Estiene d'Entraigues¹, salut. Savoir vous faisons que nous avons otroié et ordené et par ces presentes ottroions et ordenons a nostre tres chiere et tres amee compaigne la duchesse, pour la croissance de son estat, pour chacun an doresenavant tant comme il nous plaira, en oultre toutes autres assignacions, ottrois et ordennances que faitz lui avons tant pour la despense de son hostel comme autrement par quelconques noz autres lettres precedens en date ces presentes, la somme de mil livres tournois, laquelle aura et prendra chascun an aux termes et par la maniere que elle a accoustumé de prendre et avoir ses autres assignacions, de laquelle somme de mil livres tournois nous l'avons assigné estre paié en la maniere qui s'ensuit : c'est assavoir sur vous, chascun an, deux cenz cinquante livres tournois ; sur nostre tresorier de Bourbonnois, cent livres tournois ; sur le grenetier de Molins, cent et cinquante livres tournois ; sur le receveur des aides ordenees par monseigneur le roy en notre païs de Bourbonnois, chascun an, deux cenz et cinquante livres tournois ; sur le receveur des aides en Forois, deux cenz et cinquante livres tournois viennois^a chascun an. Si voulons et vous mandons que vous paiez, baillez et delivrez chascun an doresenavant a nostredite compaigne ladite somme de deux cenz et cinquante livres tournois dont elle est assignee sur vous comme dit est des deniers de vostre recepte aux termes et par la maniere dessus dit, et parmi rapportant vidimus de ces lettres pour une fois et seulement et quittance de nostredice compaigne ou du maistre de sa chambre aux deniers qui en sera chargié en recepte il nous plaist ladite somme de II^C L livres tournois que baillee lui aurez par an estre allouee en voz comptes et rabatue de vostre recepte par noz amez et feaux genz de noz comptes a Montbrison, auxquelx nous mandons que ainsi le facent sanz contredit, non obstant quelxconques autres assignacons faites par avant la date de ces presentes et ordenances, mandemens ou deffenses au contraire. Donné en nostre chastel de Molins, soubz nostre seel, le premier jour du mois de janvier l'an mil quatre cens et quatre.

Par monseigneur le duc en son conseil.