1403 (n. st.), 19 février. — Paris.

Loÿs, duc de Bourbonnois, conte de Forez et seigneur de Beaujeu, per et chamberer de France, a noz amés et feaulx gens de noz comptes, bailli, tresorier et procureur, et a tous noz autres justiciers et officiers de nostre païs et duchié de Bourbonnois ou a leurs lieuxtenans, salut et dilection. Savoir vous faisons que, de la foy et hommaige que nostre tres chiere et tres amee cousine la daulphine d'Auvergne, contesse de Sancerre, nous est tenue de faire a cause des chastel et chastellenie de Sagonne¹ et de toutes leurs appartenances et generalment de toutes les choses qu'elle doit tenir en fief de nous en nosdiz païs et duchié qui lui sont avenues aprés le decés de feu nostre tres chier et amé cousin messire Loÿs de Sancerre, jadiz connestable de France, nous, ladicte nostre cousine, avons mise et mectons de grace especial par ces presentes en respit et seuffrance jusques a ung an a compter du jour de la date de ces lettres, si vous mandons et a chascun de vous si comme a lui appartiendra que nostredicte cousine vous ne molestés, troublés ou empeschés, ne seuffrés estre molestee, troublee ou empeschee pour occasion dudit hommaige non fait durant le temps dessus dit, mais se les biens et choses dessus dictes ou aucunes d'icelles ou aucuns de ses autres biens estoient pour ce prins, saisiz ou empeschés, si les mectez ou faictes mectre tantost et sens delay a plaine delivrance, non obstant ordonnances, mandemens ou deffenses au contraire. Donné a Paris, soubz nostre seel secret, le XIX^e jour de fevrier, l'an de grace mil quatre cens et deux.

Par monseigneur le duc.