1402, 4 août. — Moulins.

Loÿs, duc de Bourbonnois, conte de Fourez, baron et seigneur de Beaujeu, per et chamberier de France, a touz ceulx qui verront ces presentes lettres, salut. Savoir faisons que, par le bon rapport qui nous a esté fait de la personne de maistre Estienne de la Grange³, licencié en loys, confianz a plain de son senz, loyauté et bonne diligence, ycellui maistre Estienne avons retenu, constitué et ordenné, retenons, constituons et ordennons nostre conseillier et advocat en nostre court et païs de Fourez aux gaiges de vint et quatre livres tournois de gages un chascun an tant comme il nous plaira, a paier yceulx gaiges auz termes accoustumez a paier noz pensions. Si donnons en mandement a nostre tresorier de Fourez qui a present est et par le temps avenir sera que audit maistre Estienne, nostre conseiller et advocat, paie et delivre un chascun an ladite somme de XXIIII livres tournois es termes dessus diz, car par rapportant vidimus de ces presentes et quittances de lui tant ce que paié lui aura esté pour ladite cause lui sera alloué en ses comptes et rabatu de sa recepte sanz aucun contredit par noz amez et feaux genz de noz comptes. Et donnons en mandement par ces mesmes lettres a nostre bailli de Fourez ou a son lieutenant que, pris dudit maistre Estiene le serment accoustumé a fere en tel cas, il dudit office le mette en possession et saysine et d'icellui le face joïr et user paisiblement. Et mandons aussi a touz noz justiciers, officiers et subgiez de nostredit païs, requerons touz autres que audit maistre Estiene comme nostre conseiller et advocat en nostredit païs et court de Fourez en faisant et excercent dehuement ledit office obeïssent et entendent diligemment, et lui donnent conseil, confort et aide se mestier en a par lui en soient requis. Donné a Molins, soubz nostre seel, le IIII^e jour du mois d'aoust, l'an de grace mil IIII^C et deux.

Par monseigneur le duc, le bailli de Bourbonnois⁴ present.