1402, 8 juin.

Loÿs, duc de Bourbonnois, conte de Forez, baron et seigneur de Beaujeu, per et chamberier de France, a noz amez et feaulx gens de nostre chambre des comptes en nostre païs de Beaujeulois, salut. Comme par certain tractié et acort fait entre nous et nostre amé cousin messire Guillaume de Beaujeu, sire d'Amplepuys, nous lui deussions fere asseoir deux C livres de rante avalue de terre, dont vous lui avés baillié en assiete la terre de Ranchal et plusieurs autres masaiges et tenemens de nostre chastellenie d'Aloignet², a lui baillié par declaracion par nostre chambre de noz comptes deux C livres, laquelle assiette n'estoit point agreable a nostredit cousin pour ce qu'il disoit que en ycelle avoit plusieurs choses que on mestoit a plus haut pris que on ne devoit ; et pour ce, veu ladicte assiete et oÿe la requeste de nostredit cousin, nous, de nostre bonne volunté et grace especial, avons donné et volu que on lui assee et baille ancor vint livres de rante avalue terre, lesquelles nous vous mandons que le plus toust que vous porrés vous baillis et assees a nostredit cousin ou plus aise par lui que fere se poura, et l'assiete que vous li baillerez desdictes vint livres avalue nous voulons que il soit comme son propre heritage, selon la forme et teneur dudit tractié et accor. Donné en nostre ville de Villefranche³, soubz nostre seel, le VIII^e jour de juing, l'an mil quatre cens et deux.

Par monseigneur le duc, monseigneur l'abbé de Monsteraramé⁴, le bailli de Bourbonnois⁵, messire Jehan le Viste⁶ et plusieurs autres presens.