1401, 28 novembre.

Loÿs, duc de Bourbonnois, conte de Forez, baron et seigneur de Beaujeu, per et chamberier de France, a noz amez et feaulx gens de noz comptes, bailli, juge, tresorier, et procureur, et autres noz conseillers en noz païs et baronnie de Beaujeuloiz, salut. Comme entre nous d'une part et nostre tres chier et amé cousin cousin messire Guillaume de Beaujeu, eussions nagaires fait, prins, traictié et aggree certain traictié et accort parmi lequel eussions donné et ottroyé a tousjours a nostredit cousin deux cens livres de annuelle rente a tournois moiennant certaines condicions, a asseoir ycelles en nosdiz païs et baronie au moins de dommaige pour nous et ou plus prouffitable pour lui, comme de ce appert a plein par les lettres dudit accort, et depuis eussions commis nostre amé et feal conseiller messire Jehan le Viste avec autres noz conseillers de enteriner, faire et acomplir ladicte assiete selon la forme et teneur dudit acort, lesquelx nosdiz conseillers eussent ainsi esleu et chosi nostre terre de Ranchal et ses appartenances, valant chascun an par vray rapport et commune estimacion huit vins livres de annuelle rente a tournois ou environ, estre assés convenable, seant et prouffitable pour nostredit cousin ; et pour acomplir la charge par nous a eulx commise en ceste partie, eussent offert et presenté pour nous a nostredit cousin nostredicte terre de Ranchal et les appartenances pour la value et estimacion de huit vins livres de rente et assiette en deducion et rabat desdiz deux cens livres tournois de rente ; neantmoins nostredit cousin, pour certaines causes et consideracions a ce le mouvans, lors refusa ladicte offre et presentacion a lui einsi faicte, et pour ce nosdiz conseillers, confianz de la faveur que tousjours avons eue et encores avons a nostredit cousin, ycelle nostre terre de Ranchal et les appartenances dessus dictes de rechief offrirent et presenterent a nostredit cousin pour la value et estimacion de sept vins et dix livres tornois de rente annuelle, laquelle offre et presentacion nostredit cousin semblablement refusa comme la precedent pour celle foiz ja soit ce que ladicte terre de Ranchal pour vray rapport et commune estimacion vaille en communes anees huit vins livres tournois de rente comme dit est. Pourquoy nous, ces choses considerees, voulans lesdiz tractié et acort sortir plein effait favorablement et ou prouffit de nostredit cousin, a plain de voz sens, confians, loiauté et bonne diligence, vous mandons et commectons et aux deux de voz que a nostredit cousin ou a ses commis a ce de par lui vous assees, baillés et delivrés justement et convenablement nostredicte terre de Ranchal et les appartenances et appendances d'icelle pour la valeur et estimacion de sept vins et dix livres tournois de annuelle rente en deducion et rebat des dictes deux cens livres tournois de rente, non obstant que ladicte terre et appartenances valent plus ; et quant aux cinquante livres tournois de rente restans a assoir, vous, en nos diz païs et baronnie de Beaujeulois, assees, baillés et delivrés a nostredit cousin lesdictes cinquante livres tournois de annuelle rente aux lieux moins dommagables pour nous et plus prouffitables pour lui, selon la forme et teneur dudit acort. Et ou cas que nostredit cousin ne vouldroit ou seroit refusans d'acepter ladicte terre de Ranchal pour les diz sept vins et dix livres tournois de rente, vous, a nostredit cousin ou a ses commis a ce de par lui assees, baillés et delivrés justement, convenablement et entirement lesdiz deux cens l. t. de rente annuelle, en et sur nostredicte terre de Ranchal et alleurs en nosdiz païs et baronnie de Beaujeulois aux lieux moins domagables pour nous et plus prouffitables pour lui selon la forme, teneur et condicion dudit acort, car de ce faire vous donnons plein povoir et mandement especial par ces presentes, par lesquelles mandons et commandons a tous noz justiciers, officiers et subgez esdiz païs et baronnie que a vous et aux deux de vous en ce faisant obeïssent et entendent diligement et vous prestent conseil, confort et aide se mestier est, et par vous en sont requis. Donné a Paris, soubz nostre seel, le XXVIII^e jour de novembre, l'an de grace mil IIII^C et un.

Par monseigneur le duc a la relacion du conseil ouquel monseigneur de Norry¹, monseigneur de l'Armite de la Faye², messire Jehan le Viste³ et autres estoient.