1400, 9 octobre. — Thizy.

Loÿs, duc de Bourbonnois, conte de Forez, baron et seigneur de Beaujeu, per et chamberier de France, a touz ceulx qui ces presentes lettres verront, salut. Savoir faisons que nous, confians a plein du sens, leauté et bonne diligence de nostre amé et feal escuier Damas de la Porte, ycellui avons institué et par ces presentes instituons et ordennons nostre capitain et chastellain de nostre chastel et chastellenie de Montmerle² avec les gages qui par noz gens lui seront ordonnez et aux autres drois et prouffiz acoustumés tant qu'il nous plaira, duquel avons aujourduy receu le serement acoustumé a ffere en tel cas. Si mandons a nostre bailli de Beaujeulois que ledit Damas mecte en possession dudit office ; mandons aussi a touz noz officiers et subgez que audit faisant et excercent sondit office obeïssent et donnent conseil et confort se mestier lui est et requis en sont, auquel Damais avons donné auctorité, povoir et mandement especial de fere et excercer sondit office et fere tout ce que au dit office appartient, peut et doit appartenir. Donné a Thisi³, le IX^e jour d'octobre, l'an mil quatre cens.

Par monseigneur le duc.