1399, 9 juillet. — Thiers.

Loÿs, duc de Bourbonnois, conte de Clermont et de Forés, par et chamberier de France, a touz ceulx qui ces lettres veront, salut. Savoir faysons que, pour le bon rapport qui fait nous a esté de maistre Estienne de la Grange², ycellui avons ordonné et retenu, ordonnons et retenons par la teneur de ces presentes en juge des ressors de nostre conté de Forez pour et en lieu de maistre Pierre Aubert, lequel, pour aucunes causes et consideracions nous mouvans a ce, en avons deschagié^a et deschargons, audit office tenir, avoir et excercer par ledit maistre Estienne a telz et samblables gaiges que pour raison dudit office prenoit et avoit droit de prendre ledit maistre Pierre tant comme il nous plaira, et audit maistre Estienne avons donné et donnons par ces meismes povoir dudit office excercer en la maniere acoustumee et de fere tout ce qui a bon et loyal officier samblablement compete et appartient de fayre. Donnans^b en mandement a noz amez et feauxl^c bailli et gens de nous comptes en Forez et a chascun d'eulx si comme a lui appartendra que, receu dudit maistre Estienne le serement en tel cas accoustumés, ilz le metent et istituent ou facent metre et istituer de par nous en possession et saisine dudit office et d'icellui avec les droiz, profis et emolumens dessus diz le facent, sueffrent et laissent joïr et user paisiblement, et a lui obeïr et entendre de tous a qu'il il appartendra en toutes choses touchans ledit office, osté et debouté de cellui office ledit maistre Pierre, lequel nous en ostons et deboutons par ces presentes. Mandons aussi a celui qui lesdis gaiges a acoustumés paier que yceulx il paie, baille et dellivre doresenavant audit maistre Estienne aux termes et en maniere acoustumez, et en reportant ces presentes ou vidimus d'icelles soubz seel autentique pour la premiere fois et quictance sur ce tout ce qu'il paié lui en aura esté sera allouez ez comptes et rebatu de la recepte de cellui a qui il appartendra par tout ou mestier sera, sans contredit aucun etc., non obstans ordonnances ou defences a ce contraire. Et en tesmoing de ce, nous avons fait mestre notre seel a ces presentes. Donné en notre chastel de Tihart³, le IX^e jour de juillet, l'an de grace mil CCC IIII^XX et dix neuf.