1398 (n. st.), 4 mars. — Bourbon-l'Archambault.

Loÿs, duc de Bourbonnois, conte de Clermont et de Fourez, per et chamberier de France. Savoir faisons a tous presens et a venir que pour consideracion des bons et aggreables services que nostre amé et feal escuier tranchant, Robinet de Vendat¹, nous a fais et fait de jour en jour et esperons qu'il face ou temps a venir, a ycellui Robinet et a ses hoirs et a ceulx qui de lui auront cause ou temps a venir, avons donné et donnons perpetuelment de nostre auctorité, certaine science et grace especial par ces presentes, par pure et simple donacion irrevocable faicte sollennelment entre les vis sans esperance de jamais revoquer ne venir au contraire, nostre tour et maison fort de Tizon², assise en nostre chastellenie de Heriçon³, avecques les foussez, grange et presseur dudit lieu, et tout le droit et action que nous y avons et povons avoir, et en employant nostre don et grace, voulons et lui avons octroyé et octroyons que pour eschange et permutacion suffisans, il lui soit baillié et assis par noz amez et feaulx gens de noz comptes a Molins au plus prés dudit lieu de Tizon trente livrees de rente appartenant a ladicte maison d'ancienneté se tant en y avoit mais que ce ne soit de noz hommes sers, et en ce non comprins ladicte maison fort et grange avecques toute justice haulte, moyenne et basse en ycelles tour, maison fort et terre, trente livrees de terre ou de ce qui y sera, sauve et reservé toutevoyes a nous et a noz successeurs ducz de Bourbonnois le fié, ressort et souveraineté d'icelles tour, maison fort et terre, en nous baillant et assignant autres trente livrees de terre ou autant comme il lui en sera baillié en semblable valeur avecques toute justice haulte, moyenne et basse en la terre qu'il a au plus pres de nostre ville de Vichi⁴ tenue de nous en foy et hommaige et ressort, et promectons en bonne foy que contre ceste presente donacion et ladicte permutacion ainssi comme elle sera faite et rapportee par nozdictes gens de noz comptes non venir par nous ne par les nostres a present ne par le temps avenir, mais ycelles et tout ce que dessus est contenu aurons ferme et aggreable a tous jours mais, et les garderons et tendrons et ferons tenir et garder par noz hoirs et successeurs fermement sans venir ou faire venir au contraire en aucune maniere a present ne par le temps avenir. Si donnons en mandement a nosdictes gens de noz comptes et a tous noz autres officierz presens et a venir et a chascun d'eulz si comme a lui appartendra que de nostre presente grace, donacion, permutacion et eschange laissent, facent et seuffrent joïr et user paisiblement ledit Robinet et ses hoirs et successeurs et ceulz qui de lui auront cause sans venir au contraire, et le mectent ou facent mectre realment et de fait en possession et saisine desdiz tour et lieu fort, grange et presseur de Tizon et desdictes trente livrees de terre ou de ce qui lui sera assis et baillié par ledit eschange, en nous baillant bonne et suffisante recompensacion et eschabge d'icelles trente livrees de terre comme dit est, et de faire ladicte assiete et recevoir ladicte recompensacion nous donnons plain povoir et mandement especial a nosdictes genz des comptes et promectons la avoir aggreable et confermer par noz lectres touteffoiz que requis en serons. Et que ce soit ferme et estable a tous jours, nous avons fait mectre nostre seel a ces presentes. Donnees en nostre ville de Bourbon⁵, l'an de grace mil trois cens quatre vins et dix sept, le quatriesme jour du mois de mars.

(Sur le repli, à gauche:) Par monseigneur le […], monseigneur de N[…]^a.