1398 (n. st.), 3 mars. — Bourbon-l'Archambault.

Loÿs, duc de Bourbonoys, conte de Clermont et de Fourez, per et chamberier de France. Savoir faisons a tous presens et advenir avons avoir esté exposé de la partie de frere Matié Terrut, prieur de Sal¹ ou diocese de Bourges, de l'ordre de Saint Augustin, soubz le prevost d'Auvahon^a, comme feu Jehan Jahon de Premilhat eust ja pieça donné, cedé, quicté et transpourté perpetuelement audit prieur et a ces successeurs prieurs dudit lieu de Sal, a cause et au profit et utilité dudit prieuré et yglise de Sal pour certaine et juste cause et tiltre, trois quartes de froment a la mesure de Montluççon de rante perpetuelle checun an que ledit feu Jehan Jayon avoit et prenoit et avoit droit de prendre et avoir annolment^b sur une vigne assise au terrour du Mas de Sal contenant un quartier ou environ, tenant a la vigne Pierre a la Valiere d'une part, et a un santier par lequel l'en va de Sal a Oulches d'autre part, laquelle vigne tient et posside a present Jehan Chaumont ; et aussi comme feu Durant a la Valiere eust donné et laissé en son testament et darreniere volonté a ycelle yglise et prieuré, pour le remede de son ame, demie quarte froment a ladicte mesure de rante chascun an que ledit feu Durant avoit et prenoit et avoit droit de prandre et avoir sur une maison assise audit lieu de Sal, tenant a la maison Helian Denis d'une part, et au chemin par lequel l'on vait de Sal a Montluçon d'autre part, laquelle maison tient a present et posside la filhe dudit Jehan Denis, et lesdictes trois quartes et demie froment de rente chascun an ainssi donnees et laissiez a ladicte yglise et prieuré et les vigne et maison desus declarees sur quoy elles sont donnés, constitués, donnés et assignez soyent en et de nostre justice, et lui et ces successeurs prieurs dudit lieu ne les pourroient tenir et pourter sans nostre license si comme il dit en nous humblement suppliant que ilh nous pleust a les amourtir, nous, volans les drois des yglises estre acreux et augmentez, de nostre certaine science et grace especial, avons amourti et amourtissons par ces presentes lesdites trois quartes et demie de froment de rante sanz finance, laquelle telle quelle nous puet ou pourroit pour ce appartenir avons donnee, quictee et remise, donnons, quictons et remetons audit prieur, et volons et nous plet que ycellui prieur et ces predecesseurs et subcesseurs prieurs dudit lieu les puissent tenir, pourter et possider perpetuelement sans ce qu'il soient ou puissent estre contraings dorezenavant et les mectre hors de leurs mains, parmi ce que ledit prieur nous ha promis et est tenus et obligués pour luy et pour ces successeurs celebrer ou fere celebrer chascun an en ladicte yglise de Sal, pour le remede des amez de nous et de nous predecesseurs et successeurs, tant que nous vivrons chascun an le jour de Nostre Dame de mars une messe de Rorate celi desuper avec les oraisons et completes qui appartiennent, et aprés nostre trespassament chascun an landemain de la commemoracion des mors une messe de requiem et de ce ledit prieur appourtera en nostre chambre des comptes a Molins lettre obligatoire soubz le seel dudit prevost et covant dudit lieu d'Auvahon, son souverain. Si donnons en mandement par ces meismes lettres a nouz amés et feaulx gens de noz comptes, bailli et tresourier de Bourbonnois et a touz noz autres justiciers et officiers et a leurs lieutenans presens et advenir et a chascun d'eulx si comme lui apartiendra que de nostre presente grace et amourtissement laissent, faissent et souffrent ledit prieur et ces successeurs joïr et user paisiblement sans les molester ou empescher ou contraindre. Et que ce soit ferme et estable a touzjours mays, nous avons fet mectre nostre seel secret a ces presentes. Donné en nostre ville de Bourbon, l'an de grace mil trois cens quatre vins et dix sept, le tiers jour de moys de mars.

Par monseigneur le duc², presens monseigneur de Norry³ et les baillis de Bourbonoys⁴ et de Fourez⁵.