1398 (n. st.), 11 février. — Moulins (Château).

Loÿs, duc de Bourbonnois, conte de Clermont et de Forestz, per et chamberier de France, a nostre tresorier de Bourbonnois, salut. Comme par l'acomplissement de cinq cens dix livres tournois de rente par nous promises a asseoir la fondacion de nostre eglise collegiale de Molins, en reste encores a asseoir trente et deux livres tournois, et soit venu a nostre congnoissance que Jehan Loncle, capitaine de nostre ville de Souvigny, ait acquis et achapté de messire Loÿs de Saint Quentin, chevalier, certaines terres situees et assises en noz chastellenies de Molins, de Beçay¹ et de Pougny² pour le pris et somme de deux cens frans pour une foys, desquelles terres ayons ordonné et soit nostre plaisir que pour et en nom de nous en soit fait le retrait, en paiant du nostre audit Jehan Loncle ladicte somme de deux cens frans qu'il en doit avoir baillé comme dit est, a ycelle somme prandre et avoir des deniers de vostre recepte pour lesdictes terres estre de par nous baillees et delivrees aux doyen et chappitre de nostre dicte eglise pour le pris et extimacion de vint livres tournois de rente en rabat et deduction desdictes trente et deux livres a eulx encore a asseoir comme dit est, nous voulons sur ce nostre plaisir estre enteriné, desirans aussi l'acomplissement de ladicte fondacion, vous mandons et enjoingnons que ladicte somme de deux cens livres tournois par nous sur vous assignee comme dit est vous, ces lettres veues, paiez, baillés et delivrés ausdis doyen et chappitre ou a leur procureur pour eulx pour en faire paiement audit Jehan Loncle pour la cause dessus dicte et par la maniere que dit est, et par rapportant ces presentes et lettre de quittance souffisante sur ce desdis doyen et chappitre ou de leur procureur pour eulx, nous voulons ycelle somme de deux cens frans par vous ainsi paiee et delivree estre alouee en voz comptes, rabatue de vostre recepte par noz amés et feaulx gens de noz comptes a Molins sans contredit aucun, non obstant ordonnances ou deffenses au contraire. Donné en nostre chastel de Molins, le XI^e jour de fevrier, l'an de grace mil trois cens quatre vins et dise sept.