1398 (n. st.), 14 janvier.

Loÿs, duc de Bourbonnois, conte de Clermont et de Fourez, per et chambarier de France, a noz amés et feaulx gens de noz comptes, salut et dilection. Oÿe la requeste de nostre amé et feal chevalier Blein Loup, mareschal et bailli de Bourbonnois¹, contenant comme par avant qu'il fust institué ou dit office de bailli, il eut plusieurs causes et procés contre pluseurs personnes en demandent et deffendent, tant par devant nostre bailli son predecesseur, comme par devant aucuns de noz chastellains. Et pour ce que de present les diz chastellains sont ses subgez a cause de son dit office de bailli et se appellacion en yssoit elle devoit venir a l'audictoire du dit bailliage se il ne fust bailli, et il entende encores avoir de present ou par le temps avenir pluseurs autres causes et procés, pour quoy lui soit neccessere de ordonner et commectre aucuns juge ou juges suffisants pour oïr et determiner de ses dictes causes. Nous, actendu et consideré ce que dit est, vous mandons et commectons que appellez par devant vous ceulx qui seront a appeller, vous oyés, cognoissiez et determinez des dictes causes, tant meues comme a movoir, en faisant sur ce es parties icelles oyés comme dit est bon et brief acomplissement de justice souvrenement et de plain senz long procés et signe de jugement. Et se appellacion ou appellacions en yssent, que il en soit empetré en noz grans jours et en iceulx en determine si comme de fere sera. De ce fere vous donnons povoir et mandement especial et voulons a vous estre sur ce obey par tous noz subgez. Donné soubz nostre seel, le XIIII^e jour de janvier, l'an mil CCC IIII^XX dix et sept.

Par le conseil ouquel monseigneur de Norry son lieutenant² et autres estoient.