1395, 21 septembre. — Paris (Hôtel de Bourbon).

Loÿs, duc de Bourbonnois, comte de Clermont et de Fourois, per et chambarier de France et seigneur de Combraille. Savoir faisons a touz presens et avenir que comme nostre amé Jehan Fourrin, receveur des aides de la guerre pour monseigneur le roy en nostre païs et duchié de Bourbonnois, meu de pitié et compassion, voulans muer de ses biens, territoires et temporelz es biens perdurables et celestielz, ainssi que exposé nous a, ayt de nouvel en certain lieu et place situee et assise ou lieu de la Villeneuve¹ pres nostre ville de Molins, jouste le chemin qui va dudit lieu de la Villeneuve a l'esglise de Lucenay² d'une part, et le chemin par lequel l'en va de la planche Rabeu au village de Villiers d'autre part, et jouste la terre d'une appellé Thibaut Fillet, la dicte place chargee chascun an envers nous en ung sestier avene et six deniers tornois de cens, encommancié ung hospital pour le herbergement et recepcion charitables des povres passans, en nous humblement requerent nostre grace et aumosne sur la dicte charge. Nous, louans, aprovans le bon et commandable propox et entencion du dit Jehan Fourrin, pour consideracion aussi des services plaisans et agreables qu'il nous a faiz en son dit office et autrement, et esperons que face ou temps avenir, a ce aussi participans soyons en messes, prieres, euvres charitables et bienfais qui illec se feront, inclinans gracieusement a la supplicacion du dit Jehan Fourrin les VI deniers tornois de cens et un sestier avene dessus desclairez en quoy la place et lieu dessus devisés sont envers nous chargiés comme dit est, audit Jehan Fourrin, pour lui et ses ayans cause, gouverneurs et administratuers du dit hospital presens et avenir avons donné, quicté et remis, donnons, quictons et remectons de nostre certaine science et grace especial par la teneur de ces presentes, et les diz lieu et place en afranchissons des maintenant a touzjours, senz ce que les gouverneurs ou administrateurs du dit hospital ne autre pour eulz en soyent doresenavant tenuz poyer a nous, a noz officiers pour nous ou de noz successeurs ducs de Bourbonnois aucune chose. Et voulons et nous plaist que des maintenant les diz VI deniers tornois et un sestier avoyne de noz territoires et papiers se in registrez y sont et soient a plain ostez, rayés et du tout en tout effaciez. Si donnons en mandement a noz amez et feaulx gens de noz comptes a Molins, a noz bailli et tresourier de Bourbonnois et a touz noz autres justiciers et officiers presens et avenir ou a leurs lieutenans et a chascun d'eulx si comme a lui appartiendra que de nostre presente grace, don et quictance laissent, facent et seffrent le dit Jehan Fourrin et sesdiz ayans causes joïr et user paisiblement et perpetuelement senz les molester, travailler ou empescher, ne fere ou souffrir estre molestez, traveilliez ou empeschiez aucunement au contraire. Et pour ce que ce soit chose ferme et estable a touzjours, nous avons fait mectre nostre seel a ces presentes, sauf en autres choses nostre droit et l'autruy en toutes. Donné en nostre hostel de Bourbon a Paris, le XXI^e jour de septembre, l'an de grace mil trois cens quatre vins et quinze.

(Sur le repli :) Par monseigneur le duc.