1395, 26 juin. — Paris.
Louis, duc de Bourbonnais etc., octroie de nouveau aux habitants de la ville de Gannat pour une durée de deux années la levée du barrage qu'ils leur a accordée pour contribuer aux réparations et à la défense de la ville.
A. Original sur parchemin, jadis scellé sur double queue, déchirée en sa partie centrale inférieure. 315 mm x 195 mm, repli 45 mm. Paris, Archives nationales, P 1376/2, n°2742.
Analyse : Titres de Bourbon, II, n°4017, p. 74.
Loÿs, duc de Bourbonnois, conte de Clermont et de Fourez, per et chamberier de France, a touz ceulx qui ces presentes lettres verront, salut. Savoir faisons que oÿe l'umble supplicacion de noz amez les conseulx, bourgois et habitans de nostre ville de Gannat1 contenant que, comme pour soustenir les fraiz et mises que il leur a convenu faire pour la reparacion et fortificacion d'icelle ville, leur eussions octroié par noz autres lettres sur ce faictes un aide appellé barrage a certain temps fini le jour de la Nativité saint Jehan Baptiste darrain passé, et encores leur conviegne fere neccesserement en ladicte ville pour la deffense et tuicion d'icelle, en oultre ce qu'il y ont fait plusieurs autres repparacions, lesquelles sens nostre aide il ne pourroient fere, veu les grans charges qui pour ce et autres faiz communs de ladicte ville leur a convenu et convient chascun jour soustenir, requerans qu'il nous pleust a eulx de rechief octroier ledit barrage a aucun temps, nous, attendu et consideré ce que dit est, auxdiz conseulx, bourgois et habitans de grace especial avons donné et octroié et par ces presentes donnons et octroions ledit barrage a le prandre, lever et recevoir ou a le bailler a ferme au plus proffitablement qu'il pourront jusques a deux ans a venir, a commencier du jour de la date de ces lettres, parmi ce qu'il le mectent et convertissent en ladicte repparacion et non ailleurs, et qu'il en soient tenuz de rendre compte a noz gens pour nous selon la forme et teneur de nozdictes autres lettres. Si donnons en mandement a noz amez et feaulx gens de noz comptes a Molins et bailli de Bourbonnois et a touz noz autres justiciers et officiers et a leurs lieuxtenens et a chascun d'eulx si comme a lui appartiendra que de nostre presente grace et octroy laissent, facent et seuffrent joïr et user paisiblement lesdiz conseulx, bourgois et habitans sens les molester ou empescher au contraire. En tesmoing de ce, nous avons fait mectre nostre seel secret a ces presentes. Donné a Paris, le XXVIe jour de juing, l'an mil CCC IIIIXX et quinze.
(Sur le revers, à gauche :) Par monseigneur le duc.
(Signé :) P. Desmer.
1. Gannat : Allier, ar. Vichy, ch.-l. c.
Édition : Olivier Mattéoni .
Consulter la bibliographie — Afficher le XML source de l'acte — Afficher la version pdf de l'acte.