1395, 21 mai. — Montbrison.

Loÿs, duc de Bourbonnois, conte de Clermont et de Foroiz, per et chambrier de France, a nostre tresorier de Forez present et avenir, salut. Maistre Jaques Fentays, bachelier en medicine, nous a fait exposer lui pour l'affection qu'il a a demourer en nostre païs, en esperance de y servir de son mestier notre tres chiere et tres amee compaigne la duchesse et noz enfanz et aussi noz subgez, de son povoir il ait esleu demourance en nostre ville de Montbrison en laquelle il n'a heritage, possessions, pensions ny autres gaiges convenables dont il peut son estat honnerablement maintenir ainssi qu'il dit, en nous humblement suppliant a lui sur ce faire aucune provision, nous, aians consideracion a ce que dit est, et que ainssi comme relaté nous a esté par aucun de nostre conseil il est moult expert de son mestier et necessere a demourer en nostredit païs, audit maistre Jaques avons octroié et octroions et voulons et nous plaist que doresenavant, a commencier du jour de la date de ces presentes, il ait dix franz de gaiges ou pension par an des deniers de vostre recepte tant come il nous plaira. Si vous mandons que les gaiges ou pension dessus diz vous paiez, bailliez et delivrez par la maniere que dit est audit maistre Jaques aux termes et en la maniere accoustumés a paier gaiges ou pensions semblables, et par rapportant ces presentes ou vidimus d'icelles soubz seel autentique pour la premiere fois et quictance sur ce, tout ce que a la cause dessus dicte paié lui aurez nous voulons estre alloué en voz comptes et rabatu de vostre recepte par noz amez et feaulx genz de noz comptes sanz contredit aucun, non obstans mandemens, deffenses au contraire. Donné en nostre ville de Montbrison, soubz nostre seel secret, le XXI^e jour de may l'an de grace mil CCC IIII^XX et quinze.