1394, 17 décembre. — Nevers.

Loÿs, duc de Bourbonnois, conte de Clermont et de Forez, per et chamberier de France, a touz ceulz qui ces lettres verront, salut. Comme par devant nostre bailli de Bourbonnois surviengnent de jour en jour moult de causes et besoingnes grans et pesans pour lesqueles expedier et mettre a fin conviengne prendre et soustenir moult de poines et labours, lesquelz, attendu le long service que ledit bailli nous a fait oudit office, il ne pourroit doresenavant bonnement supporter, nous, afin que lesdictes causes et besoingnes par deffaut de remede ne demourent a determiner et prendre fin, voulans a ce pourveoir, confians a plain du sens, loyauté et bonne diligence de nostre amé et feal conseiller en la chambre de noz comptes maistre Jehan Marchant¹, esperans que les charges qui commises lui seront a grant cure et diligence il mettra poine de acomplir, icellui avons fait, ordonné et establi, faisons, ordonnons et establissons par la teneur de ces presentes lieutenant general de nostredit bailli en et par tout nostre bailliage dessus dit ; et lui avons donné et donnons par ces mesmes plain povoir, auctorité et mandement especial dudit office exercer en la maniere acoustumé de expedier, deciser et determiner toutes et chascune les causes et besoingnes survenues et encommenciees, et qui doresenavant survendront en toutes et chascune les cours et sieges de nostredit bailli, et generalment de faire en toutes choses touchans et concernans les faiz et besoingnes dudit bailliage tout ce que y pourroit et devroit fere ledit bailli, auquel nous donnons en mandement que audit office de lieutenancie general il reçoive ledit maistre Jehan Marchant, et a touz noz autres justiciers, officiers et subgiez que audit maistre Jehan, en toutes choses touchans ledit office, obeïssent et entendent diligemment. En tesmoing de ce, nous avons fait mettre nostre seel a ces presentes. Donné a Nevers, le XVII^e jour de decembre, l'an de grace mil CCC IIII^XX et quatorze.

(Sur le revers:) Par monseigneur le duc.