1394, 7 décembre. — Montluçon (Château).

Loÿs, duc de Bourbonnois, conte de Clermont et de Fourez, par et chambarer de France et seigneur de Combrailhe, a touz ceulx qui ces lettres verront, salut. Savoir faisons par nostre amé et feaul chevalier, messire Jehan de Bonnebaut¹, nous avoir esté exposé que comme feu nostre cosin le conte de Boulegne en son vivant lui ait donné en la terre de Royterre situé et assise en nostre chastellenie de Combrailhe vint livrez de rante rendable durant la vie de nostredit chevalier comme par les lettres de nostredit cosin le conte sur ce faictes puet apparoir, et yl soit ainsi que, en la donacion dessus dicte, ne fu comprise aucune justice ainsi qu'il dit en nous humblement supplient a lui sur ce estendre et fere aucune provision, nous, aians consideracion ad ce et aux agreables et proffitables servises a nous faiz ou temps passé par ledit messire Jehan de Bonnebaut et esperons qu'il face ou temps avenir et ausi a la quantité des feux estans sur les lieux de ladicte donacion qui ne sont que cinq en nonbre, a ycellui messire Jehan de Bonnebaut avons donné et octroié, donnons et octroions de nostre certaine cience et grace especiaul par la teneur de ces presentes, et nous plet et voulons que, es lieux assis et cituez en la donnacion dessus dicte, il ait justice et segnorie jusques a sexannte soubz durant sa vie seulement. Si donnons e^a mandement a nous amez et feaulx les gens de noz contes, a nous bailli et receveur de Combrailhe et a touz nous autres justiciers et officiers ou a leurs lieutenans et a chascun de eux si comme a lui appartiendra, de nostre presente grace, don et octroy facent et suffrent et laissent ledit messire Jehan de Bonnebaut, ses gens et officiers pour lui joïr et user passiblement, car ainsi nous plet il estre fait, non obstant ordonnances, ou de fere quelxconques au contraire. En tesmoing de ce, nous avons fet mectre nostre see^b ad ces presentes. Donné en nostre chastel de Montluçon, le VII^e jour de decembre, l'an de grace mil CCC IIII^XX et quatorze.