1394 (n. st.), 8 avril. — Paris.

Loÿs, duc de Bourbonnois, conte de Clermont et de Fouroiz, per et chamberier de France, a noz bien amez messires Tristan du Bois, chevalier, et Colart de Nouroy dit le Borgne, escuier, salut et dilection. Nous avons aujourduy, date de ces lectres, veu et fait lire en nostre presence de mot a mot une cedulle seellee des seaulz de noz amez et feaulz chevaliers le sire de Norry, nostre lieutenant, et du sire de Flavy, de laquelle la teneur s'ensuit :

"Traictié et accordé est entre noble et puissant seigneur monseigneur de Norry, chambellan et conseiller du roy et lieutenant general de monseigneur le duc de Bourbonnois¹, pour et ou nom de mon dit seigneur le duc d'une part, et noble et puissant seigneur messire Raoul, seigneur de Flavy, d'autre part, c'est assavoir que le dit seigneur de Flavi baille, cesse et transporte a perpetuel heritage a mon dit seigneur le duc tout le droit, partie et porcion, tant en justice comme autrement, que le dit seigneur de Falvi avoit et povoit reclamer et demander en la place nommee le vivier de Cressi estant entre la ville de Arion² et Warti³ soubz Clermont et entre les deux montaignes qui sont aux costez du dit vivier, réservé pour le dit seigneur de Flavi aucunes terres se elles estoient es dictes montaignes en si hault lieu que les yaues d'un grant estang et vivier que monseigneur le duc entent et a esperance de faire es dictes mectes ne les puissent comprendre. Parmy ce que le dit monseigneur le duc lui asserra par declaracion et ordonnance de bonnes personnes que a ce seront commises du consentement des parties la somme de cinquante livres de terre au parisi qui seront assises au plus prouffitable du dit seigneur de Flavy et mains dommagable du dit monseigneur le duc sur la partie et porcion que le dit monseigneur le duc a contre le dit seigneur de Flavy en la terre et fief de Ronquerolles. Avecques ce fera mon dit seigneur le duc promptement paiement au dit seigneur de Flavi de la somme de deux cens frans d'or. Et en oultre aura le dit seigneur de Flavy a son prouffit seul et pour le tout deux arpens de pré ou environ assis au dessoux du chastel de Ronquerolles entre ycelui chastel et Gicourt, lesquelz deux arpens joignent a la Vorrie et a Flory Goupil et Jehan Tenut qui estoient au dit monseigneur le duc. Parmy ce que le dit seigneur de Flavi demourra chargié de paier chascun an la rente, atille et autre redevance dont le dit pré povoit estre chargié tant au dit monseigneur le duc comme au dit seigneur de Flavyiet autres, en deducion desquelles cinquante livres de terre sera baillé au dit seigneur de Flavy la partie et porcion que monseigneur a avec le dit seigneur de Flavi ou moulin de Ronquerolles avec le droit des baniers, laquelle partie de moulins et toutes les autres choses qui seront baillees au dit seigneur de Flavi pour assiete des dictes cinquante livres de terre, le dit seigneur tendra du dit monseigneur le duc et lui sera mis et adjoint avec le surplus de son fief et terre de Ronquerolles, et y aura toute et au tel juridiction et seignourie comme il a es autres parties de son fief, reservé a monseigneur le duc la juridiction, souveraineté et ressort pareillement que mon dit seigneur le duc comme conte de Clermont a tant sur la terre du dit seigneur de Flavi comme sur les autres hommes de fief et subgiez de sa dicte conté. Pour laquelle prisee faire sont elleux de la partie de monseigneur le duc messire Tristan du Bois, chevalier, et Colart de Nouroy dit le Borgne, escuier, et de la partie du dit seigneur de Flavy sont elleux et commis messires Jehan de Villers, chevalier, et Alixandre Sorbert, lesquelz ensemble ou les deux, c'est assavoir l'un presens d'un costé et l'autre d'autre auront povoir de faire la dicte assiete. Lesquelles choses furent faites et passees par les dis seigneurs ou chastel de Clermont, present messire Jehan Fouquaut dit le Borgne, messire Geffroy de Charny, chevaliers, Jehan Bertine, conseillier mondit seigneur le duc, Simon Goupille, Guillaume de Saint Gernier et Jehan de Morviller le samedi IIII^e jour d'avril l'an de grace mil CCC IIII^XX avant Pasques. Et ce fera la prisee et assiete dedens la Saint Jehan Baptiste prouchainement venant, et pour y commencier et entendre a esté prins jour du consentement des parties a assembler a Clermont avec les commissaires a de lundi prouchainement venant en cinq sepmainnes. Fait comme dessus. Ainsi signé : G. De Rosoy".

Pourquoy nous qui volons, agreons et confermons et par ces presentes approuvons le traictié et accord dessus dis et autres choses contenues et declairees en la dicte cedulle, vous mandons et commectons et a chascun de vous par soy que en la compengnie de messire Jehan de Villers, chevalier, et Alexandre Sorbert, escuier, elleux en ceste partie par ledit sire de Flavy ou de l'un d'eulz, appellez avec vous noz bailli, procureur et receveur de Clermont et autres qui feront a appeler, vous ou l'un de vous faites audit sire de Flavy l'assiete par declaracion de cinquante livres de terre au parisy dont mencion est faicte en ladicte cedulle au plus prouffitable pour lui et au mains dommagable pour nous que vous porrez dedens le temps et par la fourme et maniere declairee et contenue en ycelle cedulle. De ce faire vous donnons povoir et mandement especial, laquelle assiete par vous ainsi faite et baillee par declaracion audit sire de Flavy nous confermerons par noz lectres touteffois que requis en ce serons, parmy ce qu'il nous donne lectres suffisans de l'eschange, accort et traictié dessus diz. Donné a Paris, soubz nostre seel, le VIII^e jour d'avril, l'an mil CCC IIII^XX XIII avant Pasques.

Par monseigneur le duc en son conseil ouquel estoient monseigneur de Norry, messire Guillaume de la Pierre⁴, l'Ermite de la Faye⁵, chevaliers, sire Pierre Desmer⁶, Jehan Bertine⁷ et plusieurs autres.