1393 (n. st.), 29 mars. — Cleppé.

Loÿs, duc de Bourbonnois, conte de Clermont et de Forez, per et chamberer de France, a noz amez et feaux gens de nostre chambre des comptes en Forez, salut et dilection. Comme la terre du Mas et dez appartenances assisez en noz chastellenies et mandemens de Saint Just¹ et de Saint Morise² ait esté prise et mise par vostre ordonnance en nostre main comme comise par deffaut de fié non fait, pour ce que dame Catherine de Varey, feme fu messire Guy de Grolee, ne nous avoit point fait le fié, et nous soyens recors et remembrans que ja pieça, a la supplicacion et requeste de nostre bien amé et feal chevalier et conseiller messire Humbert de Boysi³, avon‹s› mis en respit et suffrance ladicte dame dez foy, homage dessus diz, voulens nostredit respit valoir et encor en amplians nostre grace, avons quicté, remis a nostredicte dame tout fait de comise que elle povoit avoir encorre envers nous par deffaut de foy et homage dessus diz non faiz. Et en oultre, a la priere et requeste de reverent pere en Dieu et nostre tres chier et bon ami l'evesque d'Amiens et supplicacion de nostredit conseiller son frere, avons donné et donnons a ladicte dame congié et licence^a de vendre et transporter ladicte terre audit nostre conseiller qui sera tenuz envers nous es foy et homage et autres droiz a nous appartenans a cause de ladicte terre. Si vous mandons que de noz presentes graces et octroiz vous laissiez joïr ladicte dame en levant et ostant tout empeschement par vous en ladicte terre mis par la cause dessus dicte, lequel nous en levons et ostons par ces presentes, auxquellez, en tesmoing de ce, nous avons fait mectre nostre seel. Donné soubz nostre seel, en nostre chastel de Clepieu⁴, le XXIX jour de mars, l'an mil CCC IIII^XX et douze.

Par monseigneur le duc, monseigneur de Norry⁵ presens.