1393 (n. st.), 20 mars. — Moulins.
Louis, duc de Bourbonnais etc., réforme les abus relatifs au droit de guet dans son pays de Bourbonnais et établit dans chaque châtellenie un clerc chargé de contraindre au guet et d'exécuter les défauts.
A. Original sur parchemin, signé, jadis scellé sur simple queue aujourd'hui déchirée. 295 x 480 mm. Paris, Archives nationales, P 1376/1, n°2624.
Analyse : Titres de Bourbon, II, n°3911, p. 57.
Loÿs, duc de Bourbonnois, conte de Clermont et de Fourez, per et chamberier de France et seigneur de Combraille, a tous ceulx qui verront ces presentes lettres, salut. Savoir faisons que pour obvier es grans griefs et oppressions que noz hommes, subgiez et justizables de nostre païs de Bourbonnois et par especial les nostres sans moyen ont par long temps souffers ou temps passé et sueffrent de jour en jour par les guez que ilz leur a convenu a faire tant en noz villes, chasteaulx et forteresses comme es autres de noz subgiez a qui nous les avions prestez pour guectier en leurs lieux et qui, soubz umbre dudit prest, en plusieurs et diverses manieres en ont esté grevez, pour grant et mehure deliberacion de nostre conseil avons ordenné doresenavant sur l'usance dudit guet les choses qui s'ensuyvent cy aprés1 :
Premierement que si comme autreffoiz a esté ordenné il sera cryé generalment par tout nostre païs de Bourbonnois que tous les guez prestez ou temps passé seront et sont revoquez.
Item est ordenné que la contrainte desdiz guaiz et l'excequcion des deffaux qui s'en feront doresenavant ne se fera plus par les capitaines des forteresses ne leurs commis, mais en chascune chastellenie aura ordenné un clerc qui reprandra en un papier par ordenence tous les guaictans de une chascune chastellenie et seront ordenné de gaictier par la maniere que autreffoiz l'avons ordenné par noz autres instrucions sur ce faictes, et les deffaux seront levez par ledit clerc dedans un moys, et la moitié desdiz deffaux sera baillé par la main dudit clerc audit capitaine et l'autre moitié a nostre prouffit.
Item revoquons tous gaiges de capitaines de forteresces, d'eglises et les remectons a telx gaiges comme les habitans et parrocheins desdictes eglises leur voudront octroier et donner jusques a ce que autrement en ayons ordené.
Item semblablement ordennons que ou cas ou nous presterions a aucuns de noz feaulx et subgiez gueez, nous voulons que les deffaux soient levez par noz officiers chascun en la chastellenie ou il sera commis par la main dudit clerc.
Item voulons et ordenons que noz hommes et subgiz veillent et gardent porte pour la forme et maniere que autreffoiz l'avons ordené par noz autres lettres, lesquelles nous voulons demorer en leur force et valeur et seront lesdiz clers ordenez en la maniere qui s'ensuit :
Premierement en nostre ville de Molins, Guillemin Bardelin ;
En nostre ville de Sovigny2, Huguenin de Courtilles ;
En nostre chastel et ville de Verneul3, Guillaume Guozolle ;
En nostre chastel de Chantelle4, Jehan Lamy ;
En nostre chastel et ville de Gannat5, Jehan Barrel ;
En nostre chastel et ville de Vichi, Jehan de Limoize ;
En nostre chastel de Billy6, Jehan, filz Jehan Nury ;
En nostre chastel de Chaveroche7, Huguenin des Rues ;
En nostre chastel de Belleperche8, Jehan Portier ;
En nostre chastel de Bourbon9, Jehan Perreaul ;
En nostre chastel et ville de Heriçon10, Jehan de Culant ;
En nostre chastel de la Bruere11, Janet Loci ;
En nostre chastel et ville de d'Aynay12, Janet Aloat ;
En nostre chastel et ville de Monluçon, Durand Messon ;
En nostre chastel de Murat13, Jehan Ecelin ;
En nostre ville de Villefranche de Moncenox14, Jehan Jalemin ;
En nostre fort de Monmaraut15, [ ]a.
Lesquieulx clers seront tenuz de faire le serement en la main de noz amez et feaulx gens de noz comptes, ausquieulx et a noz baillis de Bourbonnois et de Combraille et a tous noz chastelains et capitaines ou a leurs lieutenans et a chascun par soy si comme a lui appartiendra nous mandons que noz ordenences dessus dictes facent publier, cryer et assavoir chascun en son bailliage et chastellenie, et ycelles facent tenir, garder, actendre et acomplir, et voulons que nozdictes presentes ordenences soient enregistrees en nostre chambre des comptes et es papiers de nozdiz baillis, chastellains et capitaines, affin que nuls ne se puisse excuser de ignorance. Donné en nostre chastel de Molins, soubz nostre seel, le XXe jour du moys de mars, l'an mil trois cens quatre vins et douze.
Par monseigneur le duc a la relacion du conseil.
(Signé :) G. Seguin.
1. Nous reproduisons la structuration interne de l'ordonnance.
2. Souvigny : Allier, ar. Moulins, ch.-l. c.
3. Verneuil-en-Bourbonnais : Allier, ar. Moulins, c. Souvigny.
4. Chantelle : Allier, ar. Moulins, c. Gannat.
5. Gannat : Allier, ar. Vichy, ch.-l. c.
6. Billy : Allier, ar. Vichy, c. Saint-Pourçain-sur-Sioule.
7. Chavroches : Allier, ar. Vichy, c. Moulins.
8. Belleperche : Allier, ar. et c. Moulins, com. Bagneux.
9. Bourbon-l'Archambault : Allier, ar. Moulins, ch.-l. c.
10. Hérisson : Allier, ar. Montluçon, c. Huriel.
11. La Bruyère-l'Aubespin : Allier, ar. Montluçon, c. Bourbon-l'Archambault, com. Cérilly.
12. Ainay-le-Château : Allier, ar. Montluçon, c. Bourbon-l'Archambault.
13. Murat : Allier, ar. Montluçon, c. Commentry.
14. Auj. Villefranche-d'Allier : ar. Montluçon, c. Commentry.
15. Montmarault : Allier, ar. Montluçon, c. Commentry.
blanc.
Édition : Olivier Mattéoni .
Consulter la bibliographie — Afficher le XML source de l'acte — Afficher la version pdf de l'acte.