1392, 7 août.

Loÿs, duc de Bourbonnois, conte de Clermont et de Fourez, per et chambarier de France, a nostre bien amé le bailli de Fourez et noz conseilliers maistres Guillaume Garitel¹ et Gilbert Graulier², salut. Comme debbas soient meuz de long temps entre les officiers monseigneur le duc de Berry et d'Auvergne d'une part, et noz officiers d'autre part, tant es marches d'Auvergne, de Bourbonnois comme es marches de Fourez, et aussi en la chastellenie de Thiart³, de pluseurs choses tant a cause de domaine, fiez, rere ffiez comme autrement, savoir vous faisons que nous avons pris appointement ensemble pour eschiver toute matiere de discord entre mondit seigneur et nous, que noz procureurs bailleront en voz mains, ou des trois les deux, et es mains du seneschal d'Auvergne, de maistres Robert Verdier et Hugue la Roche, conseilliers de mondit seigneur et esleuz par lui, ou des troys les deux, tous lesdiz debbas par declaracion tant enciens comme nouveaulx, et que par eulx esleuz par mondit seigneur, ensemble vous la verité sera sceue en descendent sur les lieux prealablement, appellé ceux qui saront appeler, et tout ce qui sera par eulx et par vous rapporté dedans la feste de Noel prouchain venant a mondit seigneur ou a son conseil, a nous ou a nostre conseil, pour en ordener si comme il appartiendra. Si vous mandons et commettons que vous troys ensemble ou des trois les deulx, avecques les dessus diz esleuz par mondit seigneur de Berry, ou des trois les deux, descendez sur lesdiz lieux contentieux et enquerés la verité le plus loyaument que vous pourez, et rapportez a mondit seigneur ou a son conseil, a nous ou a nostre conseil, tout ce que fait en aurez dans le t[erme]^a dessus dit. Car ainsi le voulons estre fait et l'avons accordé. Et oultre avons voulu et voulons mondit seigneur et nous que laps de temps ne corre ou soit corrus contre mondit seigneur ne nous depuis la date de noz premieres lettres qui furent donnees sur lesdiz debbas jusques audit terme de Noel. De ce fere vous donnons plain povoir et mandement especial, mandons et commandons a tous noz justiciers que, a vous en ce faisant, obeïssent et entandent diligemme‹n›t. Donné le VII^e jour du mois d'aoust, l'an mil CCC IIII^XX et douze.

Par monseigneur le duc en son conseilh, ouquel vous⁴ et plusieurs autres estiez.