1392, 6 juillet. — Paris.
Louis, duc de Bourbonnais etc., donne les château, ville et châtellenie de Milly, au comté de Clermont-en-Beauvaisis, à titre perpétuel, à Regnaud de Roye, à Isabelle de Ferrières et à leurs hoirs mâles en directe descendance, en complément de la donation qu'il a faite précédemment aux deux époux.
A. Original sur parchemin, avec la majuscule de Loÿs ornée en plein de torsades, jadis scellé sur double queue du grand sceau du duc. 380 x 220 mm, repli 50 mm. Paris, Archives nationales, P 1369/1, n°1738.
Analyse : Titres de Bourbon, II, p. 51, n°3878.
Loÿs, duc de Bourbonnois, conte de Clermont et de Fouroiz, per et chamberier de France, a tous ceulx qui ces presentes lettres verront, salut. Comme par nos autres lettres nous eussions pieça donné a nostre amé et feal chevalier et chambellan messire Regnault de Roye nos chastel, ville et chastellerie de Milly1 en nostre conté de Clermont, a ycellui chastel, ville et chastellerie tenir et possider par le dit messire Regnaut durant la vie de luy et de madame Ysabel de Ferrieres, sa femme et du survivant d'eulx deux, par la forme et maniere que en nos dictes autres lettres est plus a plain contenu. Savoir faisons que nous, considerans les grans et notables plaisirs et services que ycelluy messire Regnault nous a tousjours et continuelment depuis ce fais et encores fait chascun jour et esperons que fera ou temps avenir, en acroissant nostre premier don a yceulx messire Regnault de Roye et madame Ysabel de Ferrieres, sa femme, au survivant d'eulx, a leurs hoirs masles descendans de leur corps et aux hoirs masles descendans de leurs hoirs masles par droite lignee avons donné, cedé, quicté et transporté, donnons, cedons, quictons et transportons par la teneur de ces presentes les dessus dis chastel, ville et chastellerie de Milly en nostre dicte conté de Clermont avecques tous les droiz, rentes, revenuez, jurisdicion, justice, hommagez et autres chosez quelxconquez appartenans a yceulx chastel, ville et chastellerie, terre et appartenances de Milly. Si donnons en mandement a nostre bailli de nostre dicte conté de Clermont, a tous nos autres justiciers et officiers de nostre dicte conté presens et avenir et autres a qui il appartiendra que ledit messire Regnault et madame Ysabel sa femme et leurs hoirs masles, en la maniere que dit est, de nostre presente donacion facent, sueffrent et lessent joïr et user paysiblement sans aller en aucune maniere au contraire. En tesmoing de ce, nous avons fait mectre nostre grant seel a ces presentes. Donné a Paris, le siziesme jour de juillet, l'an de grace mil trois cens quatre vins et douse.
Par monseigneur le duc.
(Signé :) P. Desmer.
1. Milly-sur-Thérain : Oise, ar. et c. Beauvais.
Édition : Olivier Mattéoni .
Consulter la bibliographie — Afficher le XML source de l'acte — Afficher la version pdf de l'acte.