1391, 17 mai. — Paris.

Loÿs, duc de Bourbonnois, conte de Clermont et de Forez, per et chamberier de France, a touz ceulx qui ces presentes lettres verront, salut. Savoir faisons que, pour le bon et notable rapport qui nous a esté faiz du sens, souffisance, prodomie et diligence de nostre bien amé Pierre Colin, nostre capitaine et chastellain de Rochebleine² et nostre procureur es chastellenies de Maleval³, de Virieu⁴, de Chavanay⁵ et de Rocheblenne et ressors d'icelles, et pour les bons et agreables services qu'il nous a fais, fait chascun jour et esperons que nous face, a ycellui Pierre avons donné et donnons par ces presentes l'office des audicions des testemens es chastellenies dessus dictes et ressors d'icelles, aus drois, prouffis et emolumens acoustumés et a ycellui office appartenant, lequel office tenoit Austorge de Champaniere, lequel, pour aucunes causes qui a ce nous muevent, nous en avons deschargé et deschargons par ces presentes, a avoir, tenir et posseder ledit office, ensemble les offices dessus diz, par ledit Pierre Colin tant comme il nous plaira. Si donnons en mandement a nostre bailli de Forez ou a son lieutenant que, receu dudit Pierre Colin le serement acoustumé de fere en tel cas, il le mecte et institue en possession et saisine dudit office, et des drois, prouffis et emolumens a ycellui appartenant le face joïr et user paisiblement, non obstans noz autres offices dessus nommés. Car ainsi nous plait il estre fait et audit Pierre Colin l'avons octroyé et octroyons de grace especial par ces presentes, ausquelles, en tesmoing de ce, nous avons fait mectre nostre seel secret. Donné a Paris, le XVII^e jour de may, l'an de grace mil CCC IIII^XX et onze.

Par monseigneur le duc, present sire Pierre Desmer⁶.