1391 (n. st.), 12 janvier. — Paris.

Loÿs, duc de Bourbonnois, conte de Clermont et de Forez, per et chambrier de France, a touz ceulz qui ces presentes lettres verront, salut. Savoir faisons que, pour les bons et agreables services que nous a faitz ou temps passé, fait chascun jour et esperons que nous faces ou temps avenir nostre bien amé et feal escuier de cusine Jehan de Montcorbier, confians a plain de ses sens, loyauté, prodomie et bonne diligence, icellui avons fait, ordenné et establi, faisons, ordenons et establissons par ces presentes nostre capitaine de noz ville et chastel de Croset² en Rouannoys, pour et en lieu de nostre amé et feal escuier Jehan Chardonnel, nagaire nostre cappitaine dudit lieu et a present nostre chastellain dudit Rouannois, aux droiz, gages, prouffis et emolumens acoustumés et audit office appartenans, a avoir, tenir, posseder, excercer et gouverner ledit office de capitaine par ledit Moncorbier tant comme il nous plaira. Si donnons en mandement par ces mesmes presentes a noz amez et feaulx gens de noz comptes et bailli de Forez et a chascun d'euls si come a lui appartiendra que, receu dudit Jehan de Montcorbier nostre escuier le serment acoustumé de faire en tel cas, icellui mectent ou facent mectre en possession et saisine dudit office et a lui obeïr comme a nostre capitaine, et les gages acoustumez ly facent paier par celui ou ceulx qui iceulx gages acoustumé de paier par la forme et maniere acoustumez et des autres droiz, prouffiz et emolumens acoustumés et audit office appartenant, facent et sueffrent ledit nostre escuier joïr et user paisiblement, osté et mis hors tout autre detenant ou occuppant ledit office non aiant noz lettres sur ce precedens en date ces presentes, lequel nous en ostons et deboutons par ces presentes, auquelles, en tesmoing des choses dessus dictes, nous avons fait mectre nostre seel secret en l'absence du grant. Donné a Paris, le XII^e jour de janvier, l'an de grace mil CCC IIII^XX et dix.

Par monseigneur le duc.