1388, 15 décembre. — Paris.

Louis, duc de Bourbonnois, conte de Clermont et de Foroiz, per et chambarier de France, a nostre bailli de Foroiz¹ et Jehan Boulier, chancellier de nostre païs de Foroiz² salut. Comme certains debbas de souveraineté et ressort de justice soient pieça mehus entre les gens et officiers de monseigneur le duc de Berry et d'Auvergne d'une part, et nos gens et officiers a cause de nostre conté de Forois d'autre, en la tere du segneur de la Roe et en certains lieux et illec entour si comme en noz autres lettres et commission est plus a plain contenu, si vous mandons et commectons par ces presentes que vous ou l'un de vous, appellé avecques vous nostre procureur et un ou deux des genz de nostre conseil estans en Forois, descendez et alez sur les lieux contencieux et selon la teneur de noz autres lettres et commission, procedez et alez avant a l'expedicion desdiz debas avecques le seneschal d'Auvergne ou autres commis sur ce par mondit seigneur de Berry, et touz exploiz et empeschemens faiz et mis contre la forme et teneur de nosdictes lettres faictes remectre au premier estat et deu, car aussi a volu et accordé mondit seigneur que si aucune chose estoit faicte de son cousté a l'encontre de ce qu'il soit reparé samblablement. Donné a Paris, soubz nostre seel, le XV^e jour de decembre l'an mil CCCC IIII^XX et huit.

Par monseigneur le duc a la relacion du conseil.