1388 (n. st.), 10 janvier.

Loÿs, duc de Bourbonnois, conte de Clarmont et de Forés, pair et chambarier de France, a tous ceulz qui ces presens lettres, salut. Savoyr vous faysons que, pour le bon report qui nous a esté fays part nous, bourgoys et habitans de nostre ville de Feur, de la leiauté et bonne dilligence de Piere Ponchon, de nostre ville de Feur², icelui avons ordonné et ordonnons par ces presentes leveur et receveur de tous l'argent qui sera ordonné de lever et autres quelconques pour la fortiffication et cloture de nostredicte ville de Feur qui novellement at esté ordonné de clorre et fermer par le commandement et ordonnance de nous, aus gages de cinquante livres pour an, a icelle somme prendre et avoir sur ladicte recepte tant qu'il nous pleira, auquel Pierre nous avons donné et donons par ces presentes plain povoir, autorité et mandement especial de amasser, cullir et recevoir tous les deniers que ordenés seront pour convertir en ladicte fortification, tant de talhes ordenees come de dons et toubtes autres aides acordees en nostre pays de Forez pour ce fait, et generalment de faire et exercer toubtes autres choses necessaires a ladicte fortification et que a bon receveur puest et doit apartenir, et parmi ce que, tous les priffais qui bailliés seront par messire Humbert de Lespinace, prieur de Saint German des Fossés³, comis par nous a governer et faire faire ladit ouvrage, il paie et delivre par son comandement et ordonance tant de priffais come autrement, en prenant certification de lui de ce que il aura paié pour les causes desur dictes, appellé avoy lui trois o quatre des plus sufficiens bourgeis de nostredicte ville, il sera alloé es comptes dudit receveur par les gens qui ordennés seront pour oÿr son compte. Mandons et comandons a tous nous justiciers, officiers et subjés, requerons toubs autres que eudit Pierre, en faisent et exercent sondit office, a lui obeïssent, entendant et lui prestent conseil, confort et aide sy mestiers est et par ly en sont requis. Donné soubs nostre seel, le X^e jour de janver, l'an de grace mil CCC IIII^XX et sept.

Par monseigneur le duc.