1386, 6 décembre / 1388, mars.

En Nom du Pere, du Fil et du Saint Esperit, Amen. Nous Loÿs, duc de Bourbonnois, conte de Clermont et de Forez, per et chambarier de France, considerans la fragilitéde humaine creature et que nulle chose en ceste mortelle vie n'est plus certaine de la mort, desirans de tout nostre povoir quant il plaira a nostre Createur que l'eure de nous adviegne nous rendre a Lui en estat de bon, vray et loyal crestien, faisons et ordenons nostre testament et derriere volunté en la forme et maniere qui s'ensuivent. Premierement, pour ce que tout le cours de nostre vie, nous avons touzjours eu et encor avons tres perfecte et ferme creance en la glorieuse per perfecte Trinité, Pere, Fil et Saint Esperit et a la tres doulce glorieuse Vierge Marie en laquelle le benoit Fil de Dieu, Jhesu Crist nostre sauveur, pour nostre redempcion veult prendre incarnacion, et aussi a la benoite court celestial de Paradis, et en cest estat protestons de vivre et morir, nous leur recommandons nostre ame en leur suppliant tres devotement que, quant l'eure de nostre trespas adviendra, qu'il leur plaist la recevoir benignement en leur compaignie. Et elisons nostre sepulture en l'eglise conventual du prieuré de Sovigny² et y voulons gesir et estre apporter de quelconque lieu que nous aillons de vie a trespassement si bonnement il se puet faire, et que nostre sepulture et remembrance soit faite ou cueur de ladicte eglise droit au pié du candelabre qui est au droit du maistre autel en descendent d'icellui oudit cueur, et d'icelle faire et acomplir parmi l'ordonnance de nostre tres chiere et tres amee compaigne la duchesse et de noz exequteurs cy dessoubz nommez, nous en chargeons noz heritiers. Item pour ce que institucion de heritier est principal commencement et fondement de testament, nous ordenons et faisons nostre heritier principal nostre tres chier et tres amé fil Jehan en la duchié de Bourbonnois et conté de Clermont et en toutes noz autres terres et paÿs. Et ou cas qu'il adviendroit que nous aurions autres enfans masles, nous voulons qu'ilz soient appanez de nostre terre selon l'ordonnance de monseigneur le roy par la forme et maniere que noz predecesseurs ducs de Bourbonnois ont acoustumé d'appaner les moinsnez. Et s'il adviendroit qu'il y eust filles, ne ou pluseurs, nous voulons que elles soient mariees par argent et conquests si aucuns en y avoit par la bonne volunté et ordonnance de mondit seigneur le roy et des amys cy dessouz nommez par la maniere que nous les ordonnons des autres choses touchanz le gouvernement de sesdiz enfans. Item nous voulons et ordenons que ou cas ou nous yrions de vie a trespassement delaissez un ou pluseurs hoirs masles ou filles moindres d'eage, que nostredicte compaigne la duchesse ait le bail, garde et governement d'iceulx seule et pour le tout par le bon conseil et ordonnance de nostre cousin le sire de Coucy, nostre pere le conte Daulphin³, nostre frere de Lebret et noz amez et feauls chevaliers et conseilliers les seigneurs de Jaligny⁴, de La Claiete⁵ et de Nourry⁶, d'appelé en ce qui toucheroit heritage des fix les trois pourveu que desdiz trois qui sont de nostre lignage soit appellé l'un. Et ou cas que nous irions de vie a trespassement et ne nostredicte compaigne ne nous survivroit ou yroit, survivroit et yroit de vie a trespassement nostredit filz estant soubz aage, nous voulons que monseigneur de Bourgoigne ait le bail, garde et governement de nostredit filz et autres noz enfans si plus en y avoit par le conseil des dessus diz ou cas toutevoies que le mariage traicté et accordé entre mondit seigneur de Bourgoigne et nous de nostredit filz et de sa fille seroit accompli et parfait et seroit en voie d'estre acompli et parfait. Et prions a mondit seigneur de Bourgoigne qu'il en vuille prandre la charge^a. Et ou cas ou il adviendroit, que ja Dieux ne vuille, que nous alessions de vie a trespassement senz hoirs de nostre corps, nous voulons et ordonnons que monseigneur le roy preigne noz duchié de Bourbonnois et conté de Clermont s'il lui plaist et les mette en sa main comme vray seigneur et heritier d'iceulx. Et lui supplions ou cas dessus dit que s'il plaist a Dieu lui donner pluseurs enfans masles, qu'il lui plaise donner nostredit duchié au secon ou trois ou a celui qu'il lui plaira et qu'il porte le nom de duc de Bourbonnois et les armes de France a telle difference comme nous et noz predecesseurs ducs de Bourbonnois les avons acoustumé de porter^b. Item nous voulons et ordonnons que en cestui devant cas, c'est assavoir ou cas que nous irions de vie a trespassement senz hoirs de nostre corps et que nostredicte compaigne la duchesse nous survivroit, que touz les conquests que nous avons faiz a quelconque tiltre que ce soit ou paÿs de Fourez soient et demeurent a heritage a nostredicte compaigne. Item nous voulons et ordonnons que la fondacion et ordonnance de nostre chapelle de Sovigny tieigne et vaille de par cest present testament la confermons par la maniere qu'il est contenu es letters de ladicte fondacion dont le prieur et convent dudit lieu en ont unes et nous avons les semblables en nostre chambre des comptes. Et aussi semblablement que l'ordenance que nous avons faite au college de Molins⁷ tiegne et vaille et que la terre que la terre que nous avons ordonnee soit poyr ce baillee et delivree et par cest tresent testament confermons et ratiffions ladicte ordonnance. Item nous ordonnons tous noz forfaiz estre amendez et noz deubtes paiees, tant ceulx qui ont esté fait de nostre temps comme ceulx du temps de feu nostre tres chier seigneur et pere dont Dieux ait l'ame, et que toutes prises, tant de blez, vins que de chevaux, soient paiez et qu'il soit crié generaulment par tout nostre paÿs et lieux solempnelx que toutes personnes a qui nous pourrions estre tenuz pour les causes dessus dictes viegnent par devers les executeurs de nostre testament. Et se ilz puent monstrer leurs forfait par lettres, tesmoings ou autres enseignemens, qu'il leur soient cordez et paiez, et si non et ils sont genz dignes de foy, qu'ilz en soient creuz par leur serement. Et de ce, nous en enchargeons noz heritiers par l'ordonnance de nozdiz exquteurs. Item nous voulons et ordonnons que noz abseques estre faiz audit lieu de Sovigny le jour de nostre sepulture moienant et parmi l'ordonance de nostredicte compaigne la duchesse et de nozdiz exequteurs. Et voulons que le jour denozdiz obseques, chascun prestre qui viendra ait quatre grox viez et sera tenuz de chanter deux messes, l'une ledit jour et l'autre le plus toust emprés qu'il pourra et que chascun povre qui y viendra aye demi gros ou du pain a la valeur ; et que au quarentiesme jour emprés se face un autre obseque, et voulons que chascun prestre qui y viendra aye deux gros et sera tenu de chanter comme dessus et chascun povre, cinq deniers tournois ; et que l'an revolu a tel jour comme noz premiers auront esté faiz, s'en face un semblable comme le ferons en ladicte eglise de Sovigny et que a chascun prestre et povre soit donné semblablement comme audit second obseque. Voulons et ordonnons en oultre que, a chascun desdiz trois obseques, le convent de Sovigny ait quinze livres tournois pour pitance, et le surplus touchant le fait de nozdiz obseques tant en luminaire, darps^c, chevaux comme autres choses nous mettons en la bonne volunté et ordonnance de nostredicte compaigne et de noz exequteurs, et de faire et bailler tout ce qu'il appartiendra, nous en chargeons et obligeons noz heitiers. Item pour ce que nous avons eu pluseurs et divers officiers comme chevaliers, genz de nostre conseil et autres, auxquelx pour les bons et agreables services qu'ilz nous ont faiz nous avons donné pluseurs et divers dons, c'est assavoir ceulx qui sont faiz de deniers, tiegnent et vaillent senz ce que on leur en puisse jamés renz demander, et ceulx de rente a vie et heritage dont ilz pourront monstrer bons et loyaulx tiltres et que nous n'avons point revoquez et dont les paiemens ne auront point esté par nous deffenduz, nous iceulx louons, ratiffions et approuvons et par cest present testament les confermons et obligeons noz heritiers a les tenir. Item pour ce que nous avons grandement grevez et orprimez noz povres subgez de Bourbonnois tant par les susides, fouages, empruns et autres subvencions que nous y avons fait lever, tant pour nostre delivrance d'Angleterre comme autrement, nous voulons et ordonnons que des prouffiz, rentes et esmolumens de noz terres et paÿs soient pris par la main de nozdiz exequteurs la somme de six mille franz a prandre a trois annees chascun an deux mille frans et que icelle somme de six mille frans soit distribuee en aulmosnes et autres euvres de misericorde, comme a marier povres pucelles, soustenir povres femmes veves, orphelins et autres bienffaiz parmi l'ordonnance de nostredicte compaigne et de noz exequteurs. Et aussi semblablement pour ce que nous avons eu en noz offices pluseurs et divers officiers qui nous ont longuement et loyaulment servi, lesquelx nous ne avons pas si bien remierceiez comme nous deussions et tenuz y sommes, nous voulons que par la main de nozdiz exequteurs soient pris deux mille et cinq cens frans, dont les deux mille seront partiz et donnez a noz officiers, et les cinq cenz aux petiz varlez et familiers de nostre hostel par l'ordonnance de nozdiz exequteurs. Item nous laissons et ordonnons pour le remede de nostre ame et pour faire noz anniversaires solempnelment chascun an en noz eglises qui sont de nostre fondacion cy dessouz nommees, en augmentacion d'icelles a perpetuité, les rentes qui s'ensuivent : premierement au college de nostre chapelle de Bourbon⁸ pour faire nostre anniversaire solempnel chascun an le jour nostre obit, cent solz tounrois ; a l'eglise de Verneuil⁹, cent solz tournois de rente ; a Nostre Dame de Montbrison¹⁰, diz livres tournois de rente ; a Saint Nicolas de Montluçon¹¹, cent solz tournois de rente ; a l'ospital de Saint Julian de nostre ville de Molins¹², cent solz tournois de rente ; lesquelx colleges et eglises seront tenuz un chascun an de faire noz anniversaires solempnelles le jour de nostre obit. Item nous voulons et ordonnons une chapelle perpetuelle estre fondee en l'eglise cathedral de Notres Dame de Chartres ou lieu et chapelle ue nous avons esleu et qui nous a esté baillee et delivree par le chapitre dudit lieu, laquelle chapelle nous voulons estre ediffiee selon que par nous sera ordonné et garnie pour une foiz seulement de roiz, calice, corporaulx, messel, vestemens et autres choses necessaires. Et en icelle chapelle voulons que soit celebree chascun jour perpetuelment une messe selon l'ordonnance qui s'ensuit, c'est assavoir le dimenche, de l'office du jour mesmes, le lundi, des mors, le mardi, du Saint Esperit, le mercredi, des mors, le jeudi de Nostre Dame selon l'office des Advens, c'est assavoir Rorate celi desuper, et cetera, le vendredi, de la Croiz, et le samedi, de Nostre Dame, c'est assavoir Salve sancta parens, et cetera. Et oultre voulons et ordonnons que chascun an soit fait en ladcite eglise un anniversaire solempnel des mors au jour qui par nous ou autres de par nous sera ordonné, et que emprés l'office dudit anniversaire, ceulx qui y seront presens aillent processionelment en nostredicte chapelle et en icelle facent une recommandacion des mors. Et pour les choses dessus dictes faire et acomplir, nous donnons et laissons chascun an de rente a ladicte eglise la somme de soixante livres de rente, c'est assavoir cinquante livres au chapelain qui deservira ladicte chapelle comme dessus est dit, et les autres diz livres tournois pour departir aux chanoines chapellains et autres de ladicte eglise qui seront presens audit anniversaire selon qu'il est acoustumé en icelle eglise, lesquelles soixante livres tournois nous ferons amortir par mondit seigneur le roy. Item nous voulons et ordonnons une autre chapelle perpetuelle estre fondee en l'eglise des Jacopins de Paris¹³, laquelle nous ferons ordonner, ediffier et garnir par une foiz seulement en la maniere que dessus est dit, en laquelle nous voulons que une messe soit chascun jour perpetuelment celebree en la maniere qui s'ensuit, c'est assavoir le dimenche, de l'office du jour mesme, le lundi, des mors, le mardi, du Saint Esperit, le mercredi, des mors, le juedi de Nostre Dame selon l'office des Advens, c'est assavoir Rorate celi de super, et cetera, le vendredi, de la Magdelene tant comme nous vivrons et emprés nostre decés, des mors, et le samedi de Nostre Dame selon le temps. Et avecques ce, ordonnons quatre anniversaires estre perpetuelment celebrez chascun an en ladicte eglise aux jours ordonnez cy dessoubz, c'est assavoir aux jours que feu le conte Robert de Clermont¹⁴, feu monseigneur le duc Loÿs nostre ayeul, feu nostre tres chier seigneur et pere le duc Pierre¹⁵, dont Dieux ait les ames, trepasserent, a chascun desdiz jours un desdiz anniversaires et le quart au jour qui sera par nous ordonné. Et pour les choses dessus dictes faire, nous donnons a ladicte eglise et freres dudit lieu en aulmosne la somme de soixante livres tournois de rente chascun an ou la valeur en blé et en vin ou une somme d'argent par une foiz pour lesdictes LX livres tournois au plus prouffitable de ladicte eglise, desdiz freres et greigneur memoire et seurté de l'acomplissement desdictes messes et anniversaires que par nozdiz exequteurs sera ordonné et que faire se pourra. Item nous donnons et laissons au college de Clermont quarante livres pour une foiz. Item aux Cordeliers de Paris, quarante livres tournois pour une foiz. Item aux Augustins dudit lieu de Paris, vint frans. Item aux Carmelins de Paris, vint frans^d. Aux Chartreux d'emprés Paris, trente frans. Aux Celestins, vint franz. Aux Quinze Vins Aveugles de Paris, quinze franz. A l'ospital de Nostre Dame de Paris, quinze frans. Aux religieux de Fremont en Beauvoisin, quinze franz. Aux freres croisiez de Clermont, quinze franz. Aux Cordeliers de Sovigny, trente frans. Aux Cordeliers de Saint Porsain¹⁶, vint franz. Aux Cordeliers de Nevers, trente franz. Aux Cordeliers de Bourges, diz franz. Aux Cordeliers de Clermont en Auvergne, diz livres tournois. Aux Cordeliers de Ron^e, diz livres tournois. Aux Cordeliers de Montbrison, vint franz. Aux chanoines de Nostre Dame du Puy, quinze livres tournois. Aux Jacopins de Nevers, diz franz. Aux Jacopins de Bourges, diz livres tournois. Aux Jacopins de Clermont en Auvergne, diz franz. Aux Jacopins de Ron, dix franz. Aux Carmes de Molins, vint frans. Aux Carmes de Clermont en Auvergne, dix franz. A l'abbé et convent de Saint Gilbert, diz livres tournois. A l'abbé et convent de Septfons¹⁷, diz livres. Au prieur de Nostre Dame de Montluçon¹⁸, cent solz. Aux religieux de Groxbostx¹⁹, cent solz tournois. Aux religieux de Messarges²⁰, cent solz. Aux religieux de Nostre Dame de Chapes²¹, cent solz. A la maison Dieu de Sovigny, cent solz. A l'ospital dudit lieu, cent solz. Aux quatre eglises cathedraux de Bourges, de Nevers, de Ostun et de Clermont, a chascune diz livres tournois. A l'ospital de Montbrison, cent solz tournois. Au college de Gannat²², diz livres tournois pour une foiz. Parmi lesquels lays et dons dessus faiz pour une foiz aux dessus diz un chascun desdiz colleges, eglises et prieurés seront tenuz de nous acompaigner perpetuelment es bienffais d'icellui et de faire un obseque solempnel au jour qui par noz exequteurs leur sera fait assavoir. Lesquelx dons et lays et autres choses dessus dictes et chascune d'icelles nous voulons et ordonnons par cest present testament estre faites et acomplies et a ce obligeons noz heritiers. Et pour cest present testament faire tenir et acomplir nous eslisons noz exequteurs, premierement nostre tres chiere et tres amee compaigne la duchesse, nostre pere le conte Daulphin son pere, nostre cousin le sire de Coucy, nostre frere le sire de Lebret, le prieur de Sovigny²³ ou celui qui sera par le temps a venir, nostre chancellier qui est a present ou sera par le temps de lors, noz amez et feaulx chevaliers et conseilliers maistres Odart de Molins²⁴, Jehan Baudereu²⁵ et Lorin de Pierrepont²⁶. Et voulons que appelez un des seigneurs de nostre sang dessus nommez, un de noz chevaliers et clers eulx trois puissent aller avant a l'exequcion de nostredit testament comme s'ils estoient touz ensemble. Item nous voulons que tous noz biens moibles et heritages soient en la main de noz exequteurs dessus diz jusques a ce que nostredit testament et chascune desdictes choses contenues en icellui soient enterinees, faites et acomplies. Auxquelx noz exequteurs nous donnons povoir, auctorité et mandement de faire et acomplir les choses dessus dictes par la forme et maniere qu'il appartyient a faire en tel cas.