1386, 14 août. — Paris.

Loÿs, duc de Bourbonnois, conte de Clermont et de Foroiz, per et chambrier de France, a notre bailli de Foroiz et a touz noz autres justiciers et officiers de notredite conté et a leurs lieuxtenans, salut. A la supplication de noz amez et feaulx messire Arnaut de Fay et messire Pons d'Iserant, chevaliers, gouverneurs des enfans moindres de ans de feu messire Guillaume, jadiz sire de Tournieu, et de leurs terres, actendu la minorité des diz enfanz et que leursdictes terres sont assises en païs de droit escript, nous, a yceulx avons donné et donnons par ces presentes de grace especial terme et respit de nous faire la foy et hommage de ce qu'il tiennent et doyvent tenir de nous en notredicte conté de Foroiz et es ressors d'icelle jusques a I an a compter de la date de ces presentes, pourveu que lesdiz gouverneurs feront serment de feaulté es mains de vous bailli ou de votre lieutenant. Si vous mandons et a chascun de vous sy comme a lui appartiendra que pour cause dudit hommage a nous non fait vous ne molestez ou empeschez lesdiz enfans et gouverneurs esdictes terres et en aucune d'icelles. Et se aucun empeschement y estoit mis pour ceste cause, nous voulons qui leur soit mis au delivré. Donné a Paris, soubz notre seel, le XIIII^e jour d'aoust, l'an mil CCC IIII^XX et six, sanz es autres choses nostre droit et en toutes l'autrui. Donné comme dessus.

Par monseigneur le duc.