1386, 13 juillet. — Chevagnes.

Loÿs, duc de Bourbonnois, conte de Clermont et de Forez, per et chamberier de France, et nous, Jehan, chevalier, sire de Bellenave, a touz ceulx qui ces presentes lectres verront, salut. Savoir faisons que, comme la jurisdicion, justice, la basse court du chastel et la chastellenie de Bellenave¹ et pluseurs autres droiz et choses soient communes par indivis entre nous, duc et sire de Bellenave dessus diz, et soit ainsi que pour eviter pluseurs plaiz, procés, riotes, debaz et discencions qui de jour en jour se fineuvent entre les genz et officiers de chascun de nous, en regart aux bien, prouffit et utilité de chascun de nous doit estre accordé entre nous, de noz bonnes voluntez et certain propoux, eu sur ce deliberacion chascun avec son conseil que les choses dessus dictes communes entre nous soient parties et divisees, et que chascun par lui ait tieigné et possidé sa droite partie et porcion telle comme par bon, just et loyal partage et division se pourra et douvra faire, nous, duc dessus dit, confianz a plain des senz, loyaultez, suffisences, sageces, prodomies et discrecions de noz amez et feaulx conseillers messire Jehan de Daumoret², chevalier, maistre de nostre hostel, des genz de nostre chambre des comptes, et de Johannot Bessolle, escuier, nostre chastelain de Rochefort³, nostredit chevalier, l'un des genz de nostredicte chambre et ledit Johannot, et nous, sire de Bellenave dessus dit, confianz de nobles homes messires Phelipes de Davenieres, chevalier, Phelippe de Beaucaire et le Camus de Bosredon, escuiers, iceulx ou les deux d'eulx avons commis et commectons par ces presentes que appelez avec eulx des genz et conseillers de chascun de nous tieulx comme expedient et convenable leur semblera, veues par iceulx, regardees et proporcionnees toutes et quelxconques les choses communes entre nous, informez premierement et avant tout euvre de et sur les valeurs, assietes, rentes, revenues, droiz et autres choses communes comme dit en regart aux païs et lieux ou les choses sont assises, et au temps present et avenir, icelles choses communes departent et divisent bien et justement le droit de l'une partie et de l'autre loyaulment et esgalement garde selon l'usage, stile, coustume, droit et observance des païs et lieux ou lesdictes choses communes sont situees au mieulx et plus prouffitablement qu'ilz pourront selon raison, lesquieulx partage et division qui, par les dessus diz, seront faiz ilz enclorront fiablement escripz soubz leurs seaulx et rapporteront par devers nous ensemble, et lesquieulx partage et division faiz par noz dessus diz commissaires comme dit est nous promectons en bonne foy avoir fermes et aggreables et iceulx confermer, ratiffier et approuver, et que se aucune chose demeure a partir que nozdiz commis ne puissent avoir parti et divisé, nous le partitrons et diviserons bien et justement a nostre povoir. Et sur ce faire lettres en maniere que les partage et division dessus diz seront fermes et valables a touz temps de faire les choses dessus dictes, donnons a noz dessus diz commis plain povoir et auctorité. En tesmoing de ce, nous avons fait mectre noz seaulx a ces presentes donnees a Chevaignes⁴, le XIII^e jour de juillet, l'an de grace mil CCC IIII^XX et six.

(Sur le repli, à gauche :) Par monseigneur le duc en son grant conseil, ouquel vous⁵, monseigneur de Norry⁶ et plusieurs estiez.