1386 (n. st.), 15 février.

Loÿs, duc de Bourbonnois, conte de Clermont et de Forez, per et chamberier de France, a tous ceuls qui ces presentes lettres verront, salut. Savoir faisons que nous avons fait, ordonné et establi, faisons, ordonnons et establissons par ces presentes nostre amé et feal secretaire Pierre Desmer nostre procureur general¹ et messagé especial a traictier, parfaire et consentir du tout en tout precizement, et delivrer en nostre nom, pour nous et noz successeurs ou ayans cause ou temps avenir la parmutacion ou eschange perpetuel de noz maisons estans a Paris, situees en la rue de la porte Bordelles et la granche seant devant avec tous les droiz, prouffis, revenues et appartenances d'icelles, lesquelles nous avons acquises de nouvel des executeurs de feu messire Hue de Roche, avecques religieuses et honnestres personnes le prieur et couvent Nostre Dame de la Charité sur Loire², de l'ordre de Cluigny, a leur maison du Noyer estant a Paris, assize ou fossé Saint Germain, jouxte nostre hostel de Bourbon. Et avec ce a bailler et delivrer aus diz religieux la seigneurie, proprieté, possession et saisine realment et de fait de noz dictes maisons acquises, et aussi de requerre, prenre et recevoir pour nous et en nostre nom, et pour noz successeurs ou aians cause, la possession et saisine corporele realment et de fait de leur dicte maison du Noyer a cause de la dicte permutacion perpetuelle ou eschange fais par nous avec les diz religieux comme dit est. Auquel nostre procureur nous avons donné et octroié, donnons et octroions par ces presentes plain povoir, auctorité et mandement especial de faire, excercer, transigier, accorder et acomplir pour nous et pour noz successeurs ou aians cause toutes les choses dessus dictes, et generalment de faire et procurer pour nous et en nostre nom toutes les choses neccessaires et convenables a traictier, consentir, accorder, parfaire et acomplir la dicte permutacion ou eschange que nous ferions ou pourrions faire se nous y estions presens en nostre personne ja feust ce que il convenist aucun mandement plus especial. Et promectons en bonne foy a avoir pour agreable, tenir et faire tenir, et garder ferme et estable a tousjours sanz venir encontre tout ce qui par nostre dit procureur sera dit, fait, traictié, baillé, delivré et accordé en ceste partie et par l'obligacion de tous noz biens. En tesmoing de ce, nous avons fait mectre nostre seel a ces presentes, le XV^e jour de fevrier, l'an mil CCC IIII^XX et cinq.

Par monseigneur le duc.