1385, 21 avril.

Loÿs, duc de Bourbonnois, conte de Clermont et de Fouroiz, per et chambarier de France, a nostre bailli de Fouroiz, et a Jehan Boulier, nostre chancellier de Fouroiz¹, salut. Comme certains debbas de souveraineté et ressort de justice soyent ja pieça mehus entre les gens et officiers monseigneur le duc de Berry et d'Auvergne, d'une part, et noz gens et officiers a cause de nostre conté de Fouroiz d'autre, en la terre du seigneur de la Roe et en certains lieux entour si comme en noz autres lettres et commission plus a plein est contenu nous vous mandons et commectons par ces presentes que vous ou l'un de vous descendra et aller sur lez lieux ilhiec entour, si comme en noz autres lettres et commission plus a plein est contenu, nous vous mandons et commectons par cez presentes que vous ou l'un de vous descendés et alés sur les lieux contentieux et, sellont la teneur de noz autres lettres et commission, procedés et alés avant a l'expedicion desdiz debbas avec le seneschal d'Auvergne et Rorbert Verdier ou autres commis sur ce par mondit seigneur de Berry, et touz esploiz et empeschemens faiz et mis contre la fourme et teneur de nozdictes lettres faictes remettre au premier et dehu estat, car ainsy l'a volu mondit seigneur, et accordé que, si aucune chouse estoit faicte de son coust a l'encontre de ce, qu'il soit repparé semblablement. Donné soubz nostre seel, le venredi XXI jour d'avril, l'an de grace mil CCC quatre vint et cinq.

Par monseigneur le duc