1382, 10 septembre. — Vincennes (Bois).

Loÿs, duc de Bourbonnois, conte de Clermont et de Foroiz, per et chambrier de France, a touz ceulx qui ces presentes lettres verront, salut. Comme par noz autres lettres¹ nous avons donné a nostre amé et feal escuier Gauvain Michaille la capitainerie et garde de nostre chastel du Fay² en nostredicte conté de Foroiz aux gaiges accoustumez, si comme contenu est en nozdictes autres lettres, savoir faisons que nous, confianz a plain du senz, loyauté et diligence dudit Michaille, ycellui avons fait, ordené et establi, faisons, ordenons et establissons par ces presentes capitaine et chastellain dudit lieu du Fay aux gaiges, proffiz et emolumens accoustumez tant comme il nous plaira, en oultre les gaiges et pensions a nostre volunté que ordené lui avons par nozdictes autres lettres. Si donnons en mandement a nostre bailli de Foroiz que nostredit escuier face et sueffre joïr et user desdiz offices et desdiz pproffiez et emolumens a yceulx appartenant, et lui face obeïr par touz noz subgés en la maniere qu'il appartient. Donné au boix de Vincenes, soubz notre seel, le X jour de septembre, l'an mil CCC IIII^XX et deux.