1382, juin. — Montbrison.

Transcription d'après B, avec corrections C.

Loÿs, duc de Bourbonnois, conte de Clermont et de Forez, per et chamberier de France. Savoir faisons a tous presens et a venir a nous avoir esté exposé de la partie de noz bien amez les bourgois et habitans de nostre ville de Saint Bonet le chastel² que comme nous eussions nagaires escript a nostre saint pere le pape et a tres reverend pere en Dieu nostre tres chier et bon ami l'arcevesque de Lion a ce que il pleust a nostredit saint pere octroyer ausdiz habitans que en ladicte ville il peussent faire faire un cimeterre pour la grant distance de chemin que il a de ladicte ville de Saint Bonnet jusques a la parroisse de ladicte ville ou il a une lieue, et a laquelle parroisse est le cimeterre de ladicte ville et y convient porter en terre les mors trespassez^a en ladicte ville et en la parroisse d'icelle aucune foiz en tres grant doubte des englois en la frontiere desquelx ladicte ville est assisse, et en faveur de nous nostredit saint pere ait octroyé ausdiz habitans que ledit cimeterre il puissent fere et leur^b ait donné sur ce sa bulle en certaine fourme, et icelle bulle ledit arcevesque de Lion ait executee ; et pour mettre a effeit le droit octroy lesdiz signifians ayent avisé certaines places en ladicte ville au plus pres de l'eglise dudit Saint Bonnet pour faire icellui cimeterre et ayent acquis le droit que avoyent aucuns de ladicte ville en icelles places, lesquelles sont a present franches et ne doivent cens ne charge aucune a nous ne a autre ; neantmoins, pour ce que lesdictes places sont en nostre justice haulte, moienne et basse, lesdiz esposans, sans nostre congié, permission et licence ne oserioient^c en icelles places faire faire ledit cimeterre si comme il dient, et nous ont humblement supplié que comme nostre amé et feal chevalier et conseillier le sire de Norry, nostre lieutenant, et aucuns des gens de nostre conseil soient descendu sur le lieu ou sont lesdictes places joignans d'un costé a l'eglise et presbitere de ladicte ville si comme l'en s'envient^d a la maison frere Jehan Boule avironnant^e ladicte eglise du costé devers oriant jusques a la grant porte par laquelle l'en entre en ladicte eglise d'une part, et d'autre part a la maison Pierre Albert a la provende messire Jehan Arnoul au jardin de la Pommelle^f, au jardin de la Bonne Villate, au jardin de Andrer^g Patras et a la maison dudit Andrer^h, et leur ait nostredit lieutenant donné congié et licence jusques a nostre presente venue de ayguer lesdictes places pour faire ledit cimeterre et de les clorreⁱ de mur, et ladicte closture leur ait limittee en sa personne et ordené la hauteur d'icelle, il nous plaise leur octroyer que en icelles places il puissant faire ledit cimeterre, non obstant que icelles places comme dit est soient de nostre justice, et icelle justice leur amortir et avec ce leur octroyer que pour acroistre ladicte eglise il puissent faire ediffier une chapelle en l'une des partiez d'icelle eglise du costé devers ledit cimeterre qui se estende du grant que elle aura icellui cimeterre. Nous adcertes, pour consideration de ce que dit est, oÿ aussi le rapport a nous fait de bouche de ce fait par nostredit lieutenant et aucuns des gens de nostre conseil, et que cette chouse si comme il nous ont rapportés^j nous est pou^k prejudiciable, attendu aussi que ce fait est euvre de misericorde, a quoy nous et un chascun bon crestien^l de nous encliner ausdit signifians, avons ottroyé et ottroyons de certaine science et grace especial que, en icelles places, il puissant faire faire ledit cimetiere et icellui clorre de mur par la maniere que par nostredit lieutenant leur a esté ordenné et selon les confinacions dessus dictes, et avec ce tout^m droit de justice que nous avons et porrionsⁿ avoir en icelles places coment ne en quelque maniere que ce soit avons amorti^o et amortisons par ces presentes et lesdictes^p places avons mises et mettons hors de nostre puissance laye, et avec ce ausdiz esposans avons donné congié et licence de faire icelle chapelle en accroissament^q de ladicte eglise en tant comme a nous est et qu'il nous appartient, et pour raison d'icellui amortisement lesdiz exposans ont promis fonder en ladicte eglise de Saint Bonnet et faire chanter perpetuelment doresenavant par chascum mois de l'an le premier jour du moys une messe a notte bien solennelment laquelle, tant comme nous vivrons, il ferons dire et cellebrer de la croix^r du saint Esperit, de Nostre Dame, de sainte Catherine ou de tel office qu'il nous plaira leur ordener, et apres nostre mort, il le feront dire des mors pour le remede et salut de l'arme^s de nous ; et de ce ont promis bailler lettres sur seel authentique en la chambre de nous comptes a Montbrison par devers nous amez et fealz conseilliers^t les gens de nostredicte chambre, auquieulx et a tous nous justicier de nostredicte conté nous mandons que de nostre presente grace et amortisement en ces cas facent et seuffrent joïr et user lesdis exposans sans les molester^u au contraire, et ces presentes fassent enregistrer en nostredicte chambre affin de perpetuel memoyre, et pour ce que ce soit ferme chose et estable a tousjours^v nous avons fait mettre nostre seel a ces lettres sauf^w en toutes choses nostre droit et l'autruy. Donné a Montbrison, ou moys de juing, l'an de grace mil CCC IIII^XX et deux.

Par monseigneur le duc, present messire de la Cloecte³ et de Norry⁴.