1381 (n. st.), 8 avril. — Moulins.

Louis, duc de Bourbonnoys, conte de Clermont et de Forez, per et chamberier de France, a nostre amé escuier Pierre de Marzat, capitaine de Murat, salut. De la partie de Pierre de Bor, capitaine de Saint Bonnet de Fours¹ pour nostre tres chiere dame et nostre, nous a esté signifié que, comme a la requeste et instance des habitans et demourants en la^a ville et paroisse dudit Saint Bonnet et des villages de Bor, des Landes et de Teilhis, nostredicte dame^b et nostre par ses lettres eust octroyé ja pieça ausdiz habitans que ledit lieu de Saint Bonnet il peussent emparer et faire fort afin de retraire eulz et leurs biens en icellui en cas de besoing, et pour action d'icellui octroy lesdiz habitans eussent et aient promis maintenir ledit fort de toutes reparacions neccessaires a fait de forteresce et de y faire guet et garde de jour et de nuit et a ce se seuffrent et soient obligés. Neantmoins depuis ce, lesdiz habitans sont venus par devers nous et soubz umbre d'aucunes choses que il nous ont donné a entendre ont obtenu lettres de nous par lesquelles nous vous mandions que lesdiz habitans vous contraignissiez a faire guet et garde a Murat² jusques a ce que par nous autrement en feust ordené^c, lesquelles choses ont esté et sont faites ou grant grief et prejudice de nostredicte dame et nostre, actendu ladicte obligacion, actendu aussi que oudit fort nostredicte dame et nostre a ses greniers ou elle fait retraire ses grains qui pourroient deperir et tourner en ruyne se ledit fort n'estoit maintenu si comme par ledit capitaine nous a esté signifié en nous humble supplicacion sur ce gracieusement prouveoir. Pour quoy nous, pour consideracion des choses dessus dictes, nous plaist et voulons que non obstant lesdictes lettres obtenues de nous par lesdiz habitans, iceulx habitans voisent doresenavant faire guet et garde oudit lieu fort de Saint Bonnet et contribuent a la fortificacion et reparacion dudit fort par la fourme et maniere que tenus y sont, et qu'il faisoient^d et ont acoustumé de faire par avant la date de nozdictes lettres^e par lesdiz habitans obtenues, et voulons iceulx habitans estre a ce contrains par ledit capitaine, ses commiz et deputez par toutes voyes deues et raisonnables. Si vous mandons que doresenavant vous ne contraignez lesdiz habitans a faire ledit guet audit lieu de Murat et du contenu en ces presentes laissiez joïr et user ledit capitaine sans le molester au contaire, car ainsi nous plaist il estre fait. Donné a Molins, soubz nostre seel, le VIII^e jour d'avril, l'an de grace mil CCC IIII^XX avant Pasques.

Par le conseil estant en la chambre des comptes, ouquel monseigneur le lieutenant³ estoit.