1381 (n. st.), 1er mars. — Paris.

Loÿs, duc de Bourbonnois, conte de Clermont et de Forés, per et chamberier de France, a nostre amé Guillaume de Souvigny, receveur de nostre conté de Clermont et a nos autres receveurs dudit lieu qui pour le temps avenir seront, salut. Comme par nos autres lettres desquelles il vous est apparu ou appara nous eussions ja pieça assignee nostre tres chere et tres amee suer, suer Marie de Bourbon¹, prieuse de l'esglise mon Seigneur Saint Loÿs de Poissi et pour les causes contenues en icelles de cinq cens livres tournois de rente a les percevoir et prandre chascun an sa vie durant sur les emolumens et revenues de nostre dicte conté de Clermont, et depuis, pour ce que la recepte de nostre dicte conté estoit si chargiee d'autres charges et assignacions faictes et mises par nos predecesseurs et nous, nostre dicte suer ne povoit bonement estre paiee ne prandre sa dicte rente nous l'eussions assignee de percevoir et prandre lesdictes cinq cens livres tournois chascun an sur la partie a nous assignee de prandre par monseigneur le roy dont Diex ait l'ame sur les aides aians cours pour lors au diocese de Beauvais, a les recevoir et lui paier par vostre main, et les dictes aides n'aient mais cours quant a present, pourquoi nous ne nostre dicte suer n'y povons aucune chose prandre. Savoir faisons que nous qui ne vouldrions en aucune maniere par nous en la provision et substentacion de l'estat de nostre dicte suer avoir aucun deffault, a icelle avons octroié et octroions derechief par ces presentes que doresenavant, durant le cours de sa vie, elle preigne et perçoyve les dictes cinq cens livres tournois de rente sur les emolumens et revenues de nostre dicte conté de Clermont en la fourme et maniere qu'elle faisoit par avant l'assignacion faite a elle par nous sur les aides aians cours a Beauvais comme dessus est dit. Si vous mandons et enjoygnons estroitement que la dicte somme de cinq cens livres tournois vous paiés desormais chascun an a nostre dicte suer ou a son certain commandement pour elle des deniers que vous recevrez des emolumens et revenues de nostre dicte conté de Clermont par la maniere et aux termes qui ensuient, c'est asavoir : au terme de l'Ascencion prochoinement venant, deux cens livres tournois, au terme de Toussains aprés ensuivant, deux cens livres tournois, et au terme de Chandelleur ensuivant, cent livres tournois. Et ainsi chascun an de terme en terme lui faictes paiement et satisfaction de la dicte somme de cinq cens livres tournois par la maniere et aux termes dessus divisés, et gardés que par vous en ce n'ait aucun deffaut comment qu'il soit, et parmi rapportant ces presentes ou vidimus d'icelles et de nos lettres dessus dictes fais soubz seel roial avec quictance de nostre dicte suer, nous voulons tout ce que ainssi paié lui aurez estre alloé es comptes de vous et chascun de vous, et rabatu de vostre recepte sans difficulté ou contredit aucun par nos amés et feaulx gens de nos comptes, non obstant autres assignacions, ordenances, mandemens ou deffenses par nous ou nos dictes gens faictes ou a faire ad ce contraires. Donné a Paris soubz nostre seel, le premier jour de mars, l'an mil trois cens quatre vins.

Par monseigneur le duc.