1380, 15 novembre. — Paris.

Loÿs, duc de Bourbon, conte de Clermont et de Forois, per et chamberier de France. Savoir faisons a touz que, pour certaines causes que a ce nous ont mehue, nous avons mis en nostre bon respit et soufrance nostre amé et feal Alienor, fame fu du seigneur de Rouche, de nous faire le foy et homaige qu'elle nous doit et est tenue de faire a cause du chasteau de Mirabel¹ en Forois, lequel elle a eu nagueres du seigneur de Vilars, son frere, par titre d'eschange, jucques a un an entier a comencier du jour de la date de ces presentes, et oultre ce de grace especial lui avons octroyé que des maintenant elle puist prendre la possession et saisine dudit chastel et d'icellui et des appartenences joïr et user, non obstant ce qu'elle ne nous en ait fait foy ne homaige, pourveu touteffoix que ce ne soit en riens nostre prejudice. Si mandons a nostre bailli de Fouroiz et a tous nous autres justiciers et officiers de nostredicte conté que ladicte Alienor de nostre presente grace fassent, soufrent et laissent joïr et user paisiblement en la maniere dessus dicte sanz aller au contraire. Donné a Paris, souz nostre seel, le XV^e jour de novembre, l'an M CCC IIII^XX.

Par monseigneur le duc.