1380, juillet.

Loÿs, duc de Bourbonnois, conte de Clermont et de Fourois, per et chambarier de France, et Guichart Dalphin¹, seigneur de Jallegny² et de la Ferté Chauderon³, a touz ceulx qui verront et orront ces presentes lettres, salut. Comme descors fussent mehuz ou en esperance de mouvoir entre nous, duc de Bourbonnois ou nostre procureur, pour et ou nom de nous d'une part, et nous Guichart Dalphin ou nom et a cause de nostre chastel et chastellenie de la Ferté d'autre part, de et sur le fait de la justice, ressort et souveraineté des lieux et hostelx Andrer Butart du Vernay en la parroche de Chantenay⁴, de l'ostel qui fut Guillaume de Prateres ou qu'il demoure a present Hugonin Bernart, de l'ostel et lieu Cochereaul, de l'ostel Perrot Dalegny, de l'ostel Dannereaul que tient a present Hugonin de la Brouce a cause de sa fame, filhe feu du dit Dannereaul, de l'ostel Guionet Dalegny que tient a present Jehan Quotaler, de l'ostel Jehan Ratier, c'est assavoir l'ostel qui est devant la maison ou le dit Ratier fait a present son feu et la terre et les bois qui sont a la partie devers Thory, des hostelx et lieux de Andrer Girart, de l'ostel Bonet, de l'ostel Puilhat, de l'ostel Guilhaut Lasner, de l'ostel Jolivet, de l'ostel Garconet que souloit tenir Guilhaut Muser, de l'ostel qui fut Bourdelier de Beduin que tient a present Perres Coheret, de l'ostel messire Jehan Regnart que tient a present Robert des Rivaz, de l'ostel du dit Robert, de l'ostel qui fut Jehan du Rivaz, de l'ostel Baudet, de l'ostel Alome de Traynay, des tenemens es coxtains sur le rivage de la Sommere, de toute la terre appellee la Virie d'Azi, de la terre du Graters que tient a present le seigneur d'Aguon, de l'ostel Jehan des Noyers d'Azi qui fut Guillemin de Lacions Dazy, de l'ostel Guillaume Petit Jehan sur le chemin par lequel l'en vient d'Azi a la Leu et des autres lieux et manoirs estans en icelli lieu devers le souloilh couchant, et de touz les droiz et appartenances des hostelz, lieux et terres devant dictes, la justice desquieux hostelx, lieux et terres dessus declarez, et le fié et ressort en aucuns lieux par le tout et en autres par parties, disoit et maintenoit chascun de nous a lui estre et appartenir. Et pour savoir la verité des diz descors nous, par commun assentement appellé noz procureurs ayons fait fere informacions, lesquelles vehues et conseilhees de commun assentement de et sur les diz descors, pour bien de pais, avons transigé, paciffié et accordé en la maniere qui s'ensuit : c'est assavoir que les lieux et hostelx du dit Jehan Ratier qui est a la partie devers Azi, assis en la parroche de Chantenay, du lieu et hostel Andrer Butart, du lieu et hostel Cochereaul, le lieu et hostel Jehan Baudet de Traynay, le lieu et hostel dit Lome de Traynay, le lieu et hostel de feu messire Jehan Regnart assis au Rivaz en la parroche de Traynay costé l'ostel de Trele Robert de Rivaz et les terres, manoirs, droiz et appartenances quelconques des lieux et hostelx declarez en ceste darrier chapitre, c'est assavoir la justice haute, moyenne et basse avecques tout ressort et souveraineté sont et demorant a nous duc de Bourbonnois et a noz hoirs et successeurs a perpetuel heritage, sauve et reservé touz fiez et reffiez des seigneurs a qui il sont tant a nous comme a autres. Et en tant quant touche la justice de Virie d'Azi par commun assentement la question demorra en estat sans prejudicie jusques a ce que le conseilh aura vehu la nommee de feu messire Hugues de Digoyne, chevalier, et de ses predecesseurs et que autrement en aura esté ordoné. Et les autres chouses dessus contenues et declareez avecques touz leurs droiz, terres et appartenances quelconques qui sont anciennement de la justice de la Ferté ou de Treynay, c'est assavoir la justice haute, moyenne et basse avecques tout ressort et souveraineté sont et demorant a nous dit seigneur de la Ferté et a noz hoirs et successeurs a pepeptuel heritage sauve et reservé touz fiez et rereffiez des seigneurs a qui il sont tant a nous comme a autres, et sauve et reservé la justice du seigneur de Traynay quelque part que elle soit. Lequel accort nous, duc de Bourbonnois, et nous, seigneur de la Ferté, et chascun de nous promettons en bonne foy et sur l'obligacion de touz noz biens tenir et attendre fermement et non venir encontre. En tesmoing desquieux chouses, nous avons mis noz seulx en ces noz presentes lettres faictes et donnees ou moys de jullet l'an de grace mil CCC quatre vinz.

(Sur le repli, à gauche :) Par monseigneur le duc en son grant conseil ouquel estoient monseigneur de Norry⁵, messire de Classy, et les gens de sa chambre des comptes. Leue en la presence monseigneur et dudit conseil.