1378, juillet. — Hérisson.

Loÿs, duc de Bourbonnois, conte de Clarmont et de Forez, per et chambarer de France. Savoer faysons que pour consideracion de la grant affection que nous predecesseurs ont toutzjourz eue a l'iglise d'Iriçon¹, de laquelle il ont esté fundeurs, nous, meuz et pour la grant volunté et entencion que nous avons de aumenter et acroytre le divin service qui se fet de jour en jour continuelment en ladicte eglise a loege et honeur de benoete Trinité dont ladicte yglise est fundee, a nouz bien doen et chapitre de ladicte yglise avons donné et donnons de certaine science et grace especial quinze livres tornois de rente annuelle et perpetuelle parmi ce que yceaux doean et chapitre seront tenuz de chanter cinq messes solempnelles dores en avant pour chescun an aus jourz et en la maniere qui s'ensuit, c'est assavoer la premiere d'icelles cinc messes de la Trinité qui sera chantee le premier mecredi aprés la Trinité, la secunde de l'Annunciacion Nostre Dame et sera chantee le premier mecredi des Avenz, la tierce de mosseigneur saint Johan Baptiste et sera chantee en la sepmaine de la Saint Johan le jour que lidit chapitre avra mieux le lesir, la quarte de mosseigneur saint Michieaul qui sera chantee le premier lundi aprés Saint Michiel, et la cinqueme des mortz qui sera chantee le samedi aprés la feste de la Chandeleur, lesquelles cinq messes nous, pour le remede de nous ames et de nostre tres chere compaigne la duchesse et de touz nous parenz et amis avons fundees, estre perpetuellement chantees en ladicte yglise pour la maniere que dit est durant nostredicte vie, et au jour que sera chantee la messe des morz pour la maniere que dit est touz les prestres estantz en ladicte yglise seront tenuz chescun de chanter des morz durant nostredicte vie sans y riens muer ne changer si ce n'estoet pour nostre ordenance, et pour chescun de ceulx jourz que se chantera chescune d'icelles messes volons les soyxante soltz pour nous ordenez pour chescune desdictes messes estre distribuetz pour ceulx a qui il appartiendra en la maniere qui s'ensuit, c'est assavoer quarante soltz es chenoines estant lors en ladicte yglise quant la messa se dira et les autres vint soltz aus viqueres de ladicte yglise lors presentz et de chanter celles cinq messes aus jourz et pour la maniere que dit est doresenavant perpetuelment se obligeront envers nous yceulx doen et chapitre, et de ce nous faront lectres en la melheur forma et maniere que fere se pourront et ycelles balheront et meteront pour devers nous amez et feaux gentz de nous comptes, auxquelx nous mandons que lesdictes quinze livres de rente par nous donnees pour ce et pour la maniere que dit est et lesqueles nous de certaine science et grace especial avons esmorties et amortisons senz finance, il assient et balhant realmant et d'effet a yceulx dean et chapitre en nostre chastellenie dudit Heriçon sans justice la ou il verront qu'il sera plus profitable et moins dommagable tant pour nous conme pour ceux dean et chapitre. Et pour ce que ce soet ferme chose et estable a touz jours, nous avons fait mectre nostre seel a ces lettres. Donnees en nostre ville d'Iriçon, ou moes de julhet, l'an de grace mil troes centz sexante dictz et huit.

Pour monsseigneur le duc.