1377, 7 août. — Montbrison.

Loÿs, duc de Bourbonoys, conte de Clermont et de Forez, per et chambarer de France, a nostre tresourer amé de nostre contee de Fourez, Estienne d'Entraigues¹, salut. Savoir vous faisons que nous, en faveur du service divin et pour la descharge des ames de nous et de noz predecesseurs contes et contesses de Forez, fundeurs de l'iglise Notre Dame de Montbrison, a noz bien amez doien et chapitre, prestres de ladicte iglise et autres ayans prouvendes en icelles, avons ouctroyé et ouctroyons par cez presentes de nostre certaine science et grace especial que les lays annuelz et amosnes a eaux faictes par nozdiz predecesseurs, lesquelz leur ont esté paiez en feble monoie puis huit ans en ça, leur soient paiez doresenavant aux termes acostumez de la monnoie courant a present, c'est assavoir franc du coing du roy monseigneur pour vint solz tournois. Et au cas que mutacion se feroit des monoies, volons que il soient paiez des choses dessus dictes de la monoie qui a icelz termes aura cours pour mondit seigneur le roy. Si vous mandons et a touz noz tresouriers de nostredicte conté qui par le temps avenir seront que lezdiz lays annuelz et aumosnes vous leur paiez doresenavant par la maniere que dit est, et par rapportant quittance desdiz doien et chapitre et autres dont dessus est faicte mention, nous voulons ce que paié leur aurez comme dit est estre alloé en voz comptes et deduit de votre recepte par noz amez et feauls genz de noz comptes sans difficulté et sans autre mandement attendre. Donné en nostre ville de Montbrison, soubz notre seel, le VII^e jour d'aoust, l'an de grace mil CCC LXXVII.

Par monseigneur le duc, vous present.