1376, 25 août. — Saint-Galmier.

Loÿs, duc de Bourbonnois, conte de Clermont et de Forois, per et chamberier de France, a nostre bailli de Forois ou a son lieutenant, salut. Nous avons oÿe la supplicacion de nostre chastellain, nos hommes et habitans de Roche Blavone¹ et de son mandement, contenant que il seroit grant proffit pour nous, pour nos hommes et habitanz desdiz lieux et pour tout le pays de environ que trois foires en l'an fussent ordenees et seans au lieu de Pailleres², et que le lieu y est bon et convenable. Si vous mandons que vous et notre procureur avecques vous vous transportez audit lieu et vous enfourmez deuement et souffisamment se ledit lieu est souffisant et convenable pour foire tenir et estre, apellez avecques vous ceulx que vous verrez qui seront a appeler. Et ou cas que vous le trouverez convenable et qui soit nostre proffis, de nos hommes et du pays d'environ comme dit est, si les faites crier, publier et tenir par la fourme et maniere que nos autres foires sont acoustumees de tenir en nostre pays de Forois, c'est assavoir la premiere a la feste saint Maurice, la seconde a la feste de la concepcion nostre Dame et la tierce a la feste saint Marc euvangeliste ou mois d'avrill. De ce faire vous donnons povoir et auctorité, par ces presentes mandons et commandons a tous nos officiers et subgez, prions et requerons tous autres que ilz vous aident et conseillent en ce faisant et obeïssant. Donné en nostre ville de Saint Galmier³, le vint et cinquieme jour de mois d'aoust, l'an mil CCC soixante et seze.

Par monseigneur le duc, present le bailly de Forois⁴.