1376 (n. st.), 24 janvier. — Montluçon.

Loÿs, duc de Bourbonnois, conte de Clermont et de Fouroys, per et chamberier de France. Savoir faisons a tous presens et avenir que comme ou contrau du mariage de feu nostre amé et feal chevalier et conseilher messire Jehan bastart de Bourbon¹ et de dame Agnes Challee, feu^a sa fame, entre les autres chouses fust parlé et acordé que ledit feu messire Jehan voult et acorda que ou cas qu'il y yroit de vie a trespassement avant la dicte dame Agnes emprés la celebracion du mariage, que la dicte dame Agnes fut dohee du chastel de Rocheffort², de la moyté de la terre et justice et autres droiz appartenans oudit chastel et chastellenie, de la moyté de la terre et justice et autres droiz de Bellanave³, de la moyté de la terre et justice de Bruille, et de la moyté de toutes autres rantes et possessions que ledit messire Jehan tenoit et possedoit ou jour du contrau dudit mariage, lequel dohere nous avions lor ratifié, voulu et acordé et par noz lettres seelleez de nostre seel en las de soye et cire vert, et ladicte dame Agnes nous heut requis et fet requerir que sondit dohere nous pleut a li delivrer et ballez et d'icelli fere joïr et user par la maniere qu'il est contenu es lettres du contrau dudit mariage et lettres de confirmation a elle octroyees sur ce. Item que comme constant le mariage dudit messire Jehan et de ladicte dame Agnes, ledit messire Jehan ait fet plusieurs aqués de rantes, terres et possessions mesmement du chastel et chastellenie de Beçay⁴ que il a acquis de nostre tres chiere et tres amee tante la contesse de Fouroys par titre de donaciom qui ou dit feu messire Jehan les donna et transporta pour agreables services et en acroissement de son bien. Item de la terre de Servant que il a aquise de feu Guillaume de Mequeux par titre de donaciom et qui nagueres est obvenue par la mort du dit Guillaume de Merqueux. Item les chouses contenues en la donaciom que jadis fut faicte ou dit messire Jehan par Jehan de la Mote Jolivet, escuier. Item le disme apellé de la Dure assis prés de Tizon⁵ que le dit messire Jehan aquist par titre d'achapt. Item les vignes et autres heritages qui furent Thomas Arnoux, nostre homme sert, que le dit messire Jehan aquist de noz jours par crie de ville et qui a lui furent vandues et estrosseez comme ou plus ouffrant et darrier encherissant. Item un hostel en nostre ville de Molins, lequel le dit messite Jehan aquist de nous par titre de donaciom, lequel hostel est assis pres de nostre chastel de Molins et fut de feu Pouleguart. Et comme constant le mariage entre le dit messire Jehan d'une part, et la dicte dame Agnes sa fame d'autre part, par la vraye et loyal amour que l'uns avoit a l'autre, heut esté faicte et acordee une donaciom mutuele : c'est assavoir que pour icelle, eux et chascun d'eux voult et acorda, donna et octroya au survivant d'iceux touz les meubles et conquez que il tendroit et possedroit le jour de son decest si comme il nous est apparu par les lettres de la dicte donaciom sur ce faictes. Si disoit et mantenoit la dicte dame Agnes que, pour vertu de la dicte donaciom mutuele, tres tous lesdiz conquest et autres si aucuns estoient et tous les meubles que ledit messire Jehan avoit et possidoit le jour de son decest estoient siens et a elle appartenoient. Et nous a requis et molt humblement supplié que il nous pleut desdiz conquez et meubles la fere user et joïr pasiblement par la maniere et forme contenues es lettres de ladicte donaciom, et disoit et mantenoit que ainsi le devions nous fere, vehu la teneur des dictes lettres, nous, avecques les gens de nostre grant conseil, vehues et regardees les lettres du contrau dudit mariage, la confirmaciom a elle faicte de son dit dohere de nous, les lettres de la donaciom mutuele et toutes les autres chouses que ladicte dame Agnes nous a exibités et monstrees, touz vehuz et regardés, et considerés les debbas qui ont esté sur ce d'une partie et d'autre, n'a pas samblé a nous ne a nostre conseil que, consideré l'estat de la personne dudit messire Jehan, que es diz conqués fetz par le dit messire Jehan par la maniere dessus dicte, la dicte dame Agnes pehut reclamez aucun droit par plusieurs causes et raisons dictes et declarees par plusieurs sages estans en nostre grant conseil. En la parfin la dicte dame Agnes, de son bon gré et pure volunté, par le conseilh de plusieurs ses amis a ce presens, de toutes les chouses dessus dictes et de tout ce que elle en povoit demander a presant et par le temps avenir, et de tout ce que li povoit ppartenir^b par cause de son dohere et des diz conqués et meubles, elle se est du tout en tout submise a nostre bonne ordenance et volunté. Pourquoy nous, vehu et regardé le bon port de la dicte dame Agnes et les bons et agreables services que elle a faiz a son dit fu mari et de ce que elle se est mise a nostre ordonnance et volunté, non obstant que a nous et a nostre conseil ne samble point que a tant nous soyons tenuz, de certaine science et grace especial avons ballé, assis et assigné a la dicte dame Agnes, tant par cause de son dit dehere comme pour touz les autres droiz que elle povoit avoir ne reclamer en toutes les chouses dessus dictes, a tenir et possider le cours de sa vie tant seulement les chouses qui s'ensuyvent : c'est assavoir le chastel et chastellenie de Roucheffort aveques lez molins, columbier dessoubz le dit chastel, justice, cens, rantes et autres drois appartenans ou dit chastel, la chastellenie, justice et appartenances de Genzat, tout ainsi comme elle fu au dit messire Jehan, une autre fois assignee par feu messire Pierre Galabrun, lors nostre bailli de Bourbonnois⁶, et Symon Bertine, lors nostre clec de Bourbonnois⁷, et que il la tenoit et possidoit le jour de son obiit, sauve et excepté trante libvres de rante qui li furent assigneez sur nostre layde de Charrouz⁸ qui a nous demoroit. Item li avons oultre baillé la terre et justice de Servant obvenue et escheue par titre de donaciom par la mort du dit feu Guillaume de Merqueux. Item le dit disme appellé de la Dure et les vignes et autres heritages qui furent Thomas Arnoux, nostre homme sert, acquises comme dit est. Item l'usage a chaussez et bastir en noz boix et forest de Bellanave es uns et proffis de l'ostel de Rocheffort et des appartenances, et le pasquage de vint pors es diz boix et forest chescun an la vie de la dicte dame durant un tel que encommence emprés la mort de la dicte dame toutes les dictes chouses seront, demorront et reviendront a nous et a noz hoirs et successeurs perpetuelment, et toutes les autres terres que le dit feu messire Jehan tenoit et possidoit par quelconque cause et titre le jour de son decest sont et demeurent a nous et a nous hoirs et successeurs. Item avons donné et donnons par ces lettres par consideraciom des chouses dessus dictes a la dicte dame Agnes et a ses hoirs touz les meubles, joyaux, vaysele et autres meubles quelconques que le dit feu messire Jehan et la dicte dame Agnes avoyent et possedoient le jour du decest du dit messire Jehan, et que la dicte dame Agnes a et posside a present es chasteaux et chastellenies de Rocheffort et de Genzat⁹ et es autres terres que nous li avons balleez et assignees en dohere par la maniere dessus dicte. Item tous ceux que elle a en ses mesons et terres movans de son costé, et touz les autres meubles et debtes qui sont et sont dehuz es autres terres qui de presens nous demeurent sont nostres et a nous demeurent sauve et excepté tout ce que la dicte dame Agnes en a pris ou fet prandre depuis la mort du dit feu messire Jehan jucques aujourduy, et des debtes fetz par le dit messire Jehan que il devoit ou jour de son decest et desquieux les parties nous ont esté balleez par devers nous segneez de la main des gens de la chambre de noz comptes, dont la dicte dame Agnes a la copie samblablement segnee, nous somes tenuz de paier et acquiter la dicte dame Agnes et ses hoirs et successeurs envers les personnes qui s'ansuivent des sommes qui s'ansuivent : c'est assavoir envres les hoirs de feu Humbert Saunier, de huit cens franz, envers Jehan Broyart, de deux cens deux frans, envers Jehan d'Antregues, tresorier de Bourbonnois¹⁰, de cent franz, envers Estienne d'Antraigues, tresorier de Fouroys¹¹, de cent frans, envres Macé de Forges, de cinquante ung frant, et touz les autres debtes contenuz ou dit rolle la dicte dame Agnes sera tenu de paier a eux a qui il sont dehus par raison. Et si aucuns autres debtes estoient hors du dit rolle que veritablement fussent dehus clers et cogneuz que les diz creanciers porront dehuement monstrer a nous et a noz gens et desquieux nous prandrons la deffense emprés ce que il seront atains et clerement monstrés, nous seront tenuz de paier la moyté et la dicte dame l'autre moyté. Et nous prometons en bonne foy garentir et deffendre envers et contre touz a la dicte dame Agnes le cours de sa vie durant tant seulement les chouses dessus distes a elle par nous ballees en dohere par les causes et raisons dessus dictes. Et si aucuns empeschemens li estoit mis pourquoy elle ne pehut joïr des dictes chouses ou de aucune d'icelles, nous serons tenuz de li randre la valeur des chouses empeschees pendant le dit debbat chescun an. Et la dicte dame Agnes et ses hoirs et successeurs acquiteront envers ceux a qui il appartiendra des debtes dessus diz que nous avons receu a nous et desquieux nous somes tenuz de la acquiter par la maniere dessus dicte. Et les chouses dessus dictes et chescune d'icelles nous prometons en bonne foy tenir, garder et actendre sans les enfraindre ne venir encontre en aucune maniere, et quant a icelles tenir et actendre, nous oblighons nous et noz biens, noz hoirs et successeurs et ceux qui de nous auront ne porront avoir causes et touz leurs biens presens et avenir. Et en tesmoing des chouses dessus dictes et affin que ce soit chouse ferme et estable, nous avons fet seyler ces presentes lettres de nostre seel, lesquelles furent faictes et donneez en nostre ville de Montluçon, ou moys de janvier, l'an mil trois cens sexante et quinze, XXIIII^e jour du dit moys de janvier.

Par monseigneur le duc en son conseil ouquel estoient monseigneur de la Claiete¹², monseigneur de Norry¹³, les gens de sa chambre des comptes et le bailli de Bourbonnois¹⁴.