1373, 10 décembre. — Montbrison (Château).

Loÿs, duc de Bourbon, conte de Clermont et de Foureis, per et chambrier de France, a touz ceulx qui ces lettres verront, salut. Savoir faisons que nous, confianz a plain de la loyauté et bonne diligence de Robert Treçon¹, et pour le bon rapport qui nous a esté fait de sa personne par plusieurs genz de nostre conseil, ycellui Robert avons fait, commis et establi, faisons, commettons et establissons clerc et notaire de nostre chambre et^a comptes de Foureis, aux pproffiz, gaiges et emolumens accoustumez a ttenir et exercer ledit office tant comme il nous plaira. Si donnons en mandement a nostre tresorier de Foureis qui est de present ou sera pour le temps avenir que les gaiges accoustumez de paier aux autres clercs de nostredite chambre des comptes ou pension paie chascun an audit Robert tant comme il sera oudit office, ou assigne sur tel prevost dont il soit bien paiez desdiz gaiges et pension. Et nous donnons en mandement a noz amez et feaux genz de noz comptes en Fourois que lesdiz gaiges ou pension allouent un chascun an es comptes de nostredit tresorier ou autre qui l'aura paié parmi rapportant ces presentes ou copie d'icelles avec quittance dudit Robert sanz contredit. Donné soubz notre seel, en nostre chastel de Montbrison, le X^e jour du mois de decembre, l'an de grace mil CCC LX et treze.