1373, 9 décembre. — Montbrison.

Louis, duc de Bourbon, conte de Clermont et de Fourois², per et chamberier de France. Faisons savoir a touz que nous, heu rapport de la souffisance et loyauté de nostre amé et feal Jehan Bolhier³, bourgois de Montbrison, ycellui faisons et establissons par ces presentes nostre chancellier et garde des seels de toute la conté de Fourois tant comme nous puet appartenir, a ttenir et garder lesdiz seels pour nous et pour nostre tres chiere et tres amee tante la contesse de Fourois, es gaiges, profiz et emolumens accoustumez a paier tant des emoluments desdiz seels comme de la moytié de la pension accoustumee a avoir pour cause dudit office tant comme plaira a nous et a nostredicte tante. Mandons et commandons a touz nos justiciers, officiers et subgez que es choses appartenant audit office li obeïssent et entendent, et a noz amez et feaulz genz de noz comptes a Montbrison que la moytié des gaiges a lui dehuz pour cause dudit office li allouent en ses comptes et deduient de sa recepte et desdiz blés le assigent si qu'il en soit paiez sanz difficulté aucune. Donné en nostre ville de Monbrison, soubz notre seel, le IX^e jour de decembre, l'an mil CCC LXXIII.

Par monseigneur le duc.