1371, 8 décembre. — Paris.

Loÿs, duc de Bourbonnois, conte de Clermont, per et chamberier de France, curateur de nostre tres chier et tres amé cousin le conte de Fourois et regent sadicte conté. Savoir faissons a tous que nous, confient a plain du sens, loyauté et bonne dilligence a nostre amé maistre Jehan du Poiet, doyen de Montbrison, ycellui maistre Jehan avons fait, commis et establi, faisons, commettons et establissons juge de ladicte conté et ressort de Fourois ou gages, profis et autres emoluments apartenant outdit office, et li avons donné et donnons plain povoir et mandement especial de oïr, terminer et finir toutez causes quelcunquez et de faire et exercer toutez autres chausez apartenant a office de jugerie. Si donnons mandement a toux lez justicier et officiers de ladicte conté, prions et requirons touz autres que oudict maistre Jehan² comme a juge de Fourois obbeÿssent et entendent diligentement et li prestent et donnent conseil, confort et ayde si mestiers est et il en sont pour luy requis. Mandons out tresaurier de Fourois qui est de present ou sera par le temps avenir que lezditz gagez acostumez il paie chascun an audit maistre Jehan luy estant outdit office, lezquelx guages dessus dis, en repportent vidimus de ces presentes et quictance dudit maistre Jehan, nous voulons estre alloués es comptes dudit tresaurier chascun an par noz amez lez gens qui oïront ses comptes sant aucun contredit. Donné a Paris, soubz notre seel, le VIII jour de decembre, l'an mil CCC LX et onze.

Par monseigneur le duc.